جڤینا جڤاتا ئەولەهیێ یا ناڤدەولەتی د دەرهەقا رەوشا ئیراق و سووریێ و ئێریشێن ئامەریکایێ یێن ل سەر وان هەردو وەلاتان دە ل سەر داخوازا رووسیایێ تێ دەستپێکرن.
شەڤا بۆری (5.2.2024) ل سەر داخوازا رووسیایێ، جڤاتا ئەولەهیێ یا ناڤدەولەتی د دەرهەقا رەوشا ئیراق و سووریێ و ئێریشێن ئامەریکایێیێن ل سەر وان هەر دو وەلاتان دە دەست ب جڤینا خوە کر.
پێشتر رووسیایێ ئێریشێن ئامەریکایێ یێن ل سەر ئیراق و سووریێ وەکی بنپێکرنا سەروەریا وان هەر دو وەلاتان بناڤ کربوون و راگەهاندبوو، ئەو ئێریش دێ ببن سەدەما بەلاڤبوونا ئالۆزیان ل رۆژهلاتا ناڤین.
ئەڤ جڤینا جڤاتا ئەولەهیێ د دەمەکێ دە یە کو وەزارەتا دەرڤە یا حکوومەتا ئیراقێ دو رۆژان پشتی وێ ئێریشا مۆشەکی یا ئیرانێ بۆ سەر هەولێرێ (17.1.2024)، ل سەر مالپەرا خوە یا فەرمی سکالایەکا ل سەر وان ئێریشان پێشکێشی جڤاتا ئەولەهیێ و نەتەوەیێن یەکگرتی کربوو، کو ئەو ئێریش ببوون سەدەما شەهیدبوون و برینداربوونا وەلاتیێن سڤیل و زرار گەهاندبوو مال و ملکێن گشتی و تایبەتی.
هێزێن ئاسمانی یێن ئامەریکایێ ژی ل سەرێ سبەها رۆژا شەمی، 3.2.2024، 7 دەڤەر ل ئیراق و سووریێ بۆمبەباران کرن و راگەهاند کو وان 85 ئارمانج هنگاڤتنە کو بنگەهێن کۆمێن ملیشیایێن گرێدایی ئیرانێ نە، ژ ڤەرێژا وان ئێریشان ژی نێزی 35 چەکداران هاتنە کوشتن.
ئێریشێن ئامەریکایێ ژ بۆ بەرسڤدانا وێ ئێریشا درۆنی یا حزبولاها ئیراقی بوون، کو ل رۆژا 28.1.2024 کربوو سەر بنگەها تاوەر 22ێ یا سەربازێن ئامەریکایێ ل سەر ئاخا ئوردنێ و سێ سەربازێن ئامەریکایی کوشتبوون و ب دەهان سەربازێن دی ژی بریندار کربوون.
