نوونەرێ فرانسایێ ل جڤاتا ئەولەهیێ یا ناڤدەولەتی رادگەهینە، «فرانسا ژ ئێریشێن ئارتێشا پاسداران یێن ل سەر هەولێرێ نیگەرانە». هەروەسا دبێژە، «فرانسا ژ بۆ پاراستنا سەقامگیریا رۆژهلاتا ناڤین پابەندە».
نوونەرێ فرانسایێ ل جڤاتا ئەولەهیێ یا ناڤدەولەتی نیكۆلاس دی ریڤێرا د جڤینا جڤاتا ئەولەهیێ یا ناڤدەولەتی دە راگەهاند، «فرانسا ب تەمامی ژ وێ رەوشا کو ل رۆژهلاتا ناڤین هەیە نیگەرانە، فرانسا ژ بۆ بەرهنگاربوونا ئێریشێن تەرۆرستی هەڤپار و پشتەڤانا ئامەریکایێ یە».
نیكۆلاس دی ریڤێرا هەروەسا راگەهاند، «فرانسا پشتەڤانیا دەستهلاتدارێن ئیراقێ ژ بۆ بەرهنگاربوونا تەرۆرێ دکە، هەروەسا ئەم ژ بۆ پاراستنا ئاشتی و ئەولەهیا ئیراق و هەرێما کوردستانێ پابەندن».
ناڤبری د دەرهەقا ئێریشێن ل سەر هەرێما کوردستانێ دە گۆت، «ئەم وان ئێریشان شەرمەزار دکن یێن کو ل سەر هێزا پێشمەرگەیان ل هەرێما کوردستانێ هاتنە کرن، هەروەسا فرانسا ژ ئێریشێن ئارتێشا پاسداران یێن ل سەر هەولێرێ نیگەرانە، کو بنپێکرنا سەروەریا ئاخا ئیراقێ یە، ئەم نیگەرانن کو ئالۆزی زێدەتر بوونە و خەلکێ سڤیل بوویە قوربانی».
