پشتی ئالۆزیێن ناڤبەرا ترکیێ و ئیراقێ د چەند ھەفتەیێن بۆری دە، سەرۆک کۆمارێ ئیراقێ عەبدولەتیف رەشید رۆژا سێشەمێ 6/2/2024 د ھەڤدیتنا لگەل وەزیرێ بەرەڤانیا ترکیێ یەشار گولەر دە تەکەز کر کو چارەسەرکرنا قەیرانان ب رێیا دیالۆگێ یە نە ب بنپێکرنا سەروەریێ و زرارگهاندن ب وەلاتیان.
ئەڤ ھەلوەستا سەرۆک کۆمارێ ئیراقێ ل بارا ئێرشێن ڤێ داویێ یێن ترکیێ بۆ سەر چەپەرێن پارتیا کارکەرێن کوردستانێ (پەکەکێ) ل ئیراقێ ھات دایین.
سەرۆکاتیا کۆمارا ئیراقێ د داخویانیەکێ دە راگھاند: عەبدولەتیف رەشید د ھەڤدیتنا خوەیا لگەل گولەر یا ل بەغدایێ دە تەکەزی ل سەر چارەسەرکرنا پرسگرێکێن سینۆری و دۆزێن ئەولەھیێ یێن د ناڤبەرا ھەر دو وەلاتان دە ب رێیا ھەڤکاری، شێور و ھەماھەنگیا ھەڤبەش و ئاڤاکرنا کۆمیتەیێن ئەولەھیێ ژ ئالیێ ھەر دو ئالیان ڤە و پێشخستنا چارەسەریێن پێویست کر.
سەرۆک کۆمارێ ئیراقێ ھەر وھا نەرازیبوونا خوە ل سەر پرسگرێکێن چارەسەرنەکری و بکارئانینا ئاخا ئیراقێ ژ بۆ تەھدیدکرنا وەلاتێن جیران و وەلاتێن دن ئەشکەرە کر.
د داخویانیێ دە وھا ھات گۆتن: “د ڤێ ھەڤدیتنێ دە رێیێن پێشخستن و خورتکرنا پەیوەندیێن دوئالی و شێوازێ ھەڤکاریێن ھەڤبەش ب تایبەتی د وارێن ئەولەکاری و دانەیێن راگھاندنێ دە ب ئاوایەکی کو خزمەتا ئەولەھی و ئارامیا ھەر دو وەلاتان بکە ھاتن گۆتووبێژکرن.”
ل گۆری ھەمان داخویانیێ، ژ ئالیێ خوە ڤە وەزیرێ بەرەڤانیا ترکیێ ژی تەکەزی ل سەر پشتەڤانیا وەلاتێ خوە ژ بۆ ئەولەھی، ئارامی و سەروەریا ئیراقێ و نێزیکبوونا وی وەلاتی بۆ بھێزکرنا ھەڤکاری و ھەماھەنگیا لگەل ترکیێ کر.
پەیوەندیێن ئیراق-ترکیێ د ھەفتەیێن داوی دە ل سەر گەلەک مژاران، ژ وان چاڤکانیێن ئاڤێ و پارتیا کارکەرێن کوردستانێ، راستی ئالۆزیێن زێدەتر هات، ڤێ یەکێ ئەنقەرە نەچار کر بەحسا ئەگەرا ئۆپەراسیۆنێن لەشکەری یێن دن ل ناڤا خاکا ئیراقێ بکە.
پارتیا کارکەرێن کوردستانێ کو ژ ئالیێ ترکیێ، ئامەریکا و یەکیتیا ئەورۆپایێ ڤە وەکە کۆمەکا تەرۆریست ھاتیە بناڤکرن، د سالا 1984 دە ل دژی حکوومەتا ترکیێ دەست ب شەرێ چەکداری کر و د ئەنجامێ دە زێدەتری 40 ھەزار کەس ھاتن کوشتن.
ئەڤ ناکۆکی دەمەکی ل ناڤا خاکا باکورێ کوردستانێ بەردەوام بوون، لێ پشتی ڤەگەرینا عەڤدللا ئۆجالانێ سەرۆکێ پەکەکێ بۆ ترکیێ و وێرانکرنا بەشەکی مەزن ژ باکورێ کوردستانێ، بریار هات دایین کو چەکدارێن پەکەکێ دەرباسی چیایێن ھەرێما کوردستانێ ببن، ئێدی شەرێ پەکەکێ و ترکیێ ب تەمامی نە ل باکور، بەلکو د ناڤا کووراهیا خاکا باشوورێ کوردستانێ تێ مەشاندن، ژ بەر ڤێ سەدەمێ ژی گەلێ باشوور و حکوومەتا هەرێما کوردستانێ راستی پرسگرێکن پڕ زێدە هاتنە.
