باشاک دەمیرتاشێ راگهاند کو ئەو ژ بۆ سەرۆکاتیا شارەداریا باژارێ مەزنا ستەنبۆلێ نابە نامزەد.
دەم پارتیێ 3یێ سباتا راگهاندبوو کو ئەو دێ ب نامزەدێن خوە بەشداری هلبژارتنێن شارەداریا باژارێ مەزنا ستەنبۆلێ ببن.
دەم پارتیێ هەروها گۆتبوو کو ئەو دێ 9ێ سباتێ نامزەدێن خوە ئەشکەرە بکن.
دەربارێ بەربژێریا باشاک دەمیرتاشێ دە ژی گەلەک ئیدیعا دهاتن کرن.
باشاک دەمیرتاشێ ئیرۆ داخویانیەک بەلاڤ کر و گۆت، وێ و دەم پارتیێ ل سەر مژارێ ل هەڤ کریە و ئەو سەرلێدانا فەرمی ناکە.
هەموو بریار ب هەماهەنگیا ل گەل پارتیا مە هاتنە دایین.
باشاک دەمیرتاشێ د داخویانیا خوە دە گۆت:
من ئانیبوو زمان کو ئەز ئامادە مە کو ژ بۆ نامزەدیا شارەداریا باژارێ مەزنا ستەنبۆلێ بەرپرسیاریا خوە ب جهـ بینم دا کو پشتگریەکە خورت بدم پۆلیتیکایا هلبژارتنا هەرێمی یا پارتیا مە.
من رۆژا 5ێ سباتا 2024ان ب شاندەیەکە نوونەرتیا پارتیا مە رە هەڤدیتن پێک ئانی و د دەربارێ هەموو گەشەدانان دە ئەز هاتم ئاگاهدارکرن.
د ئەنجاما شێورێن مەیێن هەڤبەش دە، پارتیا مە دیار کر کو وان ژ ڤێ داخویانیا هێز وەرگرتیە.
ئەم سپاسیێن خوە پێشکێشی ناڤەندا دەم پارتیێ و گەلێ خوەیێ رێزدار دکن کو د گۆتووبێژێن نامزەدیێ دە ب هەموو ئاوایی پشتگری دا و وان باوەریا خوە ب مە ئانی.
د ڤێ قۆناغێ دە مە و پارتیا مە ل هەڤ کر کو بەیاننامەیا منا نامزەدیا شارەداریا باژارێ مەزنا ستەنبۆلێ ڤەنەگوهەرە سەرلێدانێ.
دڤێ هەموو گەلێ مە و ئەندامێن پارتیا مە زانبن کو هەموو بریار ب هەماهەنگیا ل گەل پارتیا مە هاتنە دایین.
باشاک دەمیرتاشێ هەروها گۆت، د رۆژێن پێش دە بەربژێرێن کو دێ پارتیا مە راگهینە دێ بەربژێرێن مە هەموویان بن و ئەم دێ ب هەموو هێزا خوە ل پشت ڤان هەڤالان بن و ژ بۆ سەرکەفتنا پارتیا خوە بخەبتن.
ئەز ب تایبەتی رجا دکم ژ بلی داخویانیێن فەرمی یێن پارتیا مە گوهـ نەدن ت داخویانیێن دن و رێ نەدن سپەکولاسیۆنان.
ئەم دێ هەموو ب هەڤ رە ب سەر کەڤن، چ دبە بلا ببە ئەم دەست ژ پرەنسیبێن بنگەهینێن دەمۆکراسیێ، دادمەندی، وەکهەڤی و لێگەرینا ئاشتیێ بەرنادن. و ئەم دێ تەکەز بسەردکەڤن. دەم دەما مەیە!.
