ده‌وله‌تا تركیێ زه‌ختێ ل ئیراقێ دكه ژ بۆ كو ب ئاوایه‌كی چالاك ته‌ڤلی شه‌رێ ل دژی پارتیا كاركه‌رێن كوردستانێ «په‌كه‌كێ» ببه.
ڤێ هه‌فته‌یێ وه‌زیرێ پاراستنێ یێ تركیێ یه‌شار گوله‌ر سه‌ردانا به‌غدایێ كر و ب سه‌رۆكوه‌زیر و سه‌رۆككۆمارێ ئیراقێ جڤیا، یێك ژ سه‌ده‌م و ئارمانجێن سه‌ره‌كه یێن ڤێ سه‌ردانێ «نه‌چاركرنا ئیراقێ یه ژ بۆ كو ب ئاوایه‌كی چالاك ته‌ڤلی شه‌رێ ل دژی په‌كه‌كێ ببه».
سه‌ردانا وه‌زیرێ پاراستنێ یێ تركیێ یه‌شار گویله‌ر، پاش سه‌ردانا هه‌فته‌یا رابووری یا سه‌رۆكێ ده‌زگه‌ها ئیستخباراتا تركیێ «میت»ێ ئیبراهیم كالن بۆ به‌غدایێ تێ. د هه‌ردو سه‌ردانان ده رایه‌دارێن ترك ب ده‌وله‌تا ئیراقێ ره بازاره‌كه سیاسی، عه‌سكه‌ری و ئابووری كرنه، وان ژ ئیراقێ ره گۆتنه: «دڤێ هوون ب ئاوایه‌كی چالاك ته‌ڤلی شه‌رێ ل دژی په‌كه‌كێ ببن» و ئه‌ڤ یێك ب مه‌رج ژ بۆی پێشده‌برنا تێكلیێن ئابووری یێن دوئالی ده‌ستنیشان كرنه.
چاڤكانیێن د حكوومه‌تا ئیراقێ ده ئاشكه‌ره كرن، وه‌زیرێ پاراستنێ یێ تركیێ زه‌خت ل سه‌رۆكوه‌زیر محه‌مه‌د شه‌یاع سوودانی و سه‌رۆككۆمار عه‌بدوله‌تیف ره‌شید كر كو دڤێ ئیراق په‌یمانه‌كێ ب تركیێ ره ئیمزه بكه و د وێ په‌یمانێ ده سۆز بده كو ئه‌وێ ب كریار و ب ئاوایه‌كی چالاك ته‌ڤلی شه‌رێ ل دژی په‌كه‌كێ ببه.
ل گۆری ئاگاهیێن ده‌ستێ مه، رایه‌دارێن ترك «ته‌ڤلیبوونا چالاك یا ئیراقێ» د شه‌رێ ل دژی په‌كه‌كێ ده ب مه‌رجێ سه‌ره‌كه ژ بۆی ده‌وام و پێشده برنا تێكلیێن ئابووری یێن دوئالی ده‌ستنیشان كرنه.
چاڤكانیێن حكوومه‌تا سوودانی هه‌ر وها ئاشكه‌ره كرن كو د جڤینان ده رایه‌دارێن ترك گۆتنه رایه‌دارێن ئیراقێ: «ئێدی ده‌وله‌تا تركیێ ته‌نێ ب هه‌لوه‌ستا ئیراقێ یا رازیبوونێ ل سه‌ر ئۆپه‌راسیۆنێن وێ یێن د هوندرێ ئاخا ئیراقێ ده رازی نابه و دڤێ ده‌وله‌تا ئیراق ته‌ڤلی شه‌ر ببه».
هه‌ر وها هه‌ر یێك ژ وه‌زیرێ پاراستنێ و سه‌رۆكێ «میت»ێ ژ رایه‌دارێن ئیراقێ خوه‌ستنه كو دڤێ په‌یمانه‌ك د نێڤبه‌را «ئه‌نقه‌رێ و به‌غدایێ» ده وه‌ره ئیمزه كرن و ل گۆری وێ هه‌بوونا په‌كه‌كێ ب یێك جاری ل ناڤا ئاخا ئیراقێ ده وه‌ره تونه كرن، په‌یمانه‌كه هه‌مئاوایێ په‌یمانا ل نێڤبه‌را «ته‌هران و به‌غدایێ» ئه‌وا كو پارتیێن مخاله‌فتا ئیرانێ یێن ل سینۆرێ ئیراقێ و ئیرانێ تونه كری.
