ئیسرایلێ چەندین جھێن رۆژئاڤایێ شامێ مووشەکباران کرن

ئیسرایلێ ئێریشی سەر چەند جھێن ل دەردۆرا شامێ کر و ل گۆری ھاتیە بەلاڤکرن، تەنێ زیانێن مادی دەرکەتنە.

ئاژانسا فەرمی یا سووریەیێ “سانا” ل سەر زارێ ژێدەرەکی لەشکەری بەلاڤ کر، ئارتێشا ئیسرایلێ ئیرۆ دەمژمێر 01:05، ژ ئالیێ گۆلانێ ڤە ب مووشەکان ئێریشی چەند خالێن ل دەردۆرا شامێ کرن.

وی ژێدەری گۆت ژی، سیستەما بەرەڤانیا ئاسمانی یا ئارتێشا سووریەیێ پرانیا مووشەکان خستن خوارێ و د ئەنجاما ئێریشێ دە تەنێ زیانێن مادی دەرکەتنە.

ژ ئالیێ خوە ڤە رەوانگەھا سووری یا مافێن مرۆڤان (SOHR) ژی بەلاڤ کر، ئیسرایلێ ئێریشی دەڤەرێن دیماس و پرۆژەیا دومەرێن ل دەردۆرا کرن.

رەوانگەھێ ئاماژە ب وێ ژی کر، ئەگەر ھەیە د ڤان ئێریشان دە کەسایەتیێن نە سووری ھاتبن ئارمانجکرن.

ل گۆری زانیاریێن ژ دەستپێکا ئیسال ڤە، ئیسرایلێ 10 جاران خاکا سووریێ کریە ئارمانج و 28 خال و مەخزەنێن چەکان و بارەگەھێن لەشکەری وێران کرنە.

ھەروھا د ئەنجاما وان 10 ئێریشان دە، 24 لەشکەرێن سووری و چەکدارێن ملیسێن سەر ب پاسدارێن ئیرانێ ڤە ھاتنە کوشتن و 7 کەس ژی بریندار بوونە.