پشتی 128 رۆژان، ھێزێن ئیسرایلی 2 ژ دیلێن کو د 7 جۆتمەھا بۆری دە ژ ئالیێ چەکدارێن حەماسێ ڤە ھاتبوون رەڤاندن، رزگار کرن.
ئارتێشا ئیسرایلێ د داخویانیەکێ دە بەلاڤ کر، وان شەڤا بۆری د ئۆپەراسیۆنەکێ دە، 2 ژ دیلێن کو د 7 جۆتمەھا بۆری دە ژ ئالیێ حەماسێ ڤە ھاتبوون رەڤاندن، ل باژارێ رەفەحێ یێ ل باشوورێ غەزەیێ رزگار کرن.
وەزیرێ بەرەڤانیێ یێ ئیسرایلێ یۆاڤ گالانت ئاشکەرە کر، ئۆپەراسیۆن ب بەشداریا ئارتێش، ھێزێن تایبەتێن پۆلیس و ئاژانسا ئەولەکاریێ (شاباک) و ب شۆپاندنا سەرۆکوەزیر بەنیامین نەتانیاھو ھاتە کرن.
ھەروەھا ھات راگەھاندن، 2 دیلێن کو ھاتنە رزگارکرن، فرناندۆ سمۆن مارمان (60 سالی) و لۆویس ھار (70 سالی) نە. ھەر دو دیل ژی ژ بۆ پشکنینا بزیشکی بۆ نەخوەشخانەیەکا تەل ئەڤیڤێ ھاتن راکرن.
ژ ئالیێ خوە ڤە، بەردەڤکێ ئارتێشا ئیسرایلێ دانیێل ھەگاری راگھاند، د ئۆپەراسیۆنا رزگارکرنا دیلان دە، شەر و پەڤچوون لگەل چەکدارێن حەماسێ دەرکەتن.
رۆژا 7 جۆتمەھا 2023 تەڤگەرا حەماسێ ئێریشی سەر ئیسرایلێ کربوو، ھەژمارەک ژ ئیسرایلیان کوشتن و ھەژمارەک ژی وەک دیل رەڤاندن، پشترە ژی ئیسرایلێ دەست ب ئێریشەکا دژوار ل سەر غەززەیێ کر.
بەشەک ژ دیلان پشتی رێکەفتنا دەمکی د بەردێلا ئازادکرنا ھەژمارەک ژ گرتیێن حەماسێ ھاتن بەردان، لێ ل گۆری نڤیسینگەھا سەرۆکوەزیریا ئیسرایلێ، 132 دیل د دەستێ حەماسێ دە مانە و دۆرا کێم 30 دیلان ژی د ئێرشێن ل سەر غەزەیێ دە ھاتنە کوشتن.
