سەرۆکێ حکوومەتا ھەرێما کوردستانێ و سەرۆک کۆمارێ ترکیەیێ جڤیان.
سەرۆکێ حکوومەتا ھەرێما کورداستانێ مەسروور بارزانی و سەرۆک کۆمارێ ترکیەیێ رەجەب تەییب ئەردۆگان د پەراوێزا لووتکەیا جیھانی یا حکوومەتان دە ل دوبەی جڤیان.
د جڤینێ دە کو وەزیرێن دەرڤە، بەرەڤانی، ئەنەرژی، چاڤکانیێن سرووشتی و بازرگانی یێن ترکیەیێ ژی ئامادە بوون، رەوشا گشتی یا ئیراق و ناڤچەیێ و گەشەپێدانا پێوەندیێن دوئالی ھاتن گۆتووبێژکرن.
ھەر دو ئالیان تەکەزی ل سەر بھێزکرنا ھەڤکاری و ھەڤاھەنگیێ ژ بۆ پاراستنا ئەولەھی و ئارامیا ناڤچەیێ کرن.
ھەر ئیرۆ و د چارچۆڤەیا لووتکەیا جیھانی یا حکوومەتان دە، سەرۆکێ حکوومەتا ھەرێما کوردستانێ مەسروور بارزانی لگەل ئەمیندارێ گشتی یێ کۆمکارا عەرەبی ئەحمەد ئەبولخەیت جڤیابوو.
لووتکەیا جیھانی یا حکوومەتان ل دوبەی دۆھ (دوشەم، 12/2/2024) ب تەڤلیبوونا سەرۆکوەزیرێ ھەرێما کوردستانێ مەسروور بارزانی و 25 سەرۆک و سەرکردەیێن وەلاتێن رۆژھلاتا ناڤین و جیھانێ، شاندیێن 85 رێکخستنێن ناڤدەولەتی، 300 وەزیران و 120 شاندێن حکوومەتان ھات دەستپێکرن، و دێ ھەتا سبە (چارشەمبێ، 14/2/2024) بەردەوام بە.
سەرۆکوەزیر مەسروور بارزانی دۆھ گۆتارەکا گرنگ ب زمانێ ئنگلیزی د وێ لووتکەیێ دە پێشکێش کر و بال کێشا سەر گوھەرتن و پرسێن نھا یێن دەڤەرێ و جیھانێ. سەرۆکێ حکوومەتا ھەرێما کوردستانێ د گۆتارا خوە دە تەکەز ژی کر کو گەلێ کوردستانێ داخوازەکا رەوا ژ بۆ دەستنیشناکرنا مافێ چارەنڤیسێ خوە ھەیە و پێدڤییە رێز ل مافێن رەوا یێن گەلێ کورد بێ گرتن.
