کۆمپانیا گازا نشتیمانی یا ئیرانێ رادگەهینە، «د دو کریارێن تێکدەرانە دە ل دو جهێن جودا، تۆرا بەلاڤکرنا گازێ یا ناڤخوەیی یا ئیرانێ هات تەقاندن».
ئاژانسا ئێرنایێ یا ئیرانی ژ زارێ برێڤەبەرێ بەلاڤکرنا گازا نشتیمانی یا ئیرانێ سەعید عەقیلی بەلاڤ کریە، سەرێ سبەها ئیرۆ چارشەمیێ، 14\02\2024 د دو کریارێن تێکدەرانە دە بۆریا بەلاڤکرنا گازێ ل باژارکێ برۆجینی یێ پارێزگەها چارمەهالێ و بەختیاریێ و باژارکێ سەفایێ یێ پارێزگەها فارسێ هات تەقاندن.
هەروەسا ئاماژە دایە، ژ بەر وان تەقینان زرار نەگەهشتیە چ کەسەکی و ئاگر ژی هاتیە کۆنترۆلکرن. هەر دیسا تیمان ژی ژ بۆ چارەکرنا وێ بۆریێ و تۆرا بەلاڤکرنا گازێ دەست ب کاری کریە و بزاڤێ دکن ب زووترین دەم دیسا دەست ب بەلاڤکرنا گازا تەر بکن.
ل دووڤ گۆتنێن عەقیلی، وەزیرێ پەترۆلێ و بەرپرسێن دی یێن پەیوەندیدار ل ئۆدەیا ئۆپەراسیۆنان جڤیانە و لژنەیەکا تایبەت ژ بۆ لدووڤچوونا وێ روودانێ هاتیە پێکئانین.
ئەشکەرە ژی کر کو ژ بەر وێ تەقینێ، بەلاڤکرنا گازا تەر ل چەند دەڤەران هاتیە راوەستاندن، لێ گازا LPG ب رەنگەکێ دەمکی هاتیە دابینکرن، هەتا ئەو بۆری تێ چارەکرن.
