سمکۆ عەبدولعەزیزی

دەما عەڤدللا ئۆجالان دەرباسی سووریێ بووی و ل ور نیشتەجی بووی، بارەگەهێ خوە یێ سیاسی و له‌شكه‌رى ئاڤاکر، د وێ دەمێ دە “خه‌جێ” یه‌ك ژ رێڤەبەرێن به‌رچاڤ یێن “پارتیا ئالا كوردستانێ” بوو ل باكورێ كوردستانێ، خەجێ گوتنه‌كە پڕ بالکێش هەیە کو دبێژە؛ “هه‌ر ده‌وله‌ته‌كا هاریكارییا پارتیه‌كا كوردى بكه‌، ژ بۆی ئارمانجێن خوە هاریکاریا وێ دکە و گرنگترین ئارمانج ژى ئەڤە كو كۆنترۆلا وێ پارتیێ و هێزا مرۆڤی یا پارتیێ بکە.”

ل گۆر ڤێ ئاخافتنێ بلا ئەم هزر بکین گەلۆ چما ده‌وله‌تا سووریێ و ده‌ستهه‌لاتا پارتیا به‌عس یا سووریێ ولاتێ خوە كر‌ ئۆتێلەکە پێنج ستێر ژ عەڤدللا و چەکدارێن وی رە؟

گەلۆ قەی ده‌وله‌تا سووریی باوه‌رى ب مافێن گەلێ كورد هەیە؟

كورد دبێژن، “گەر فلان کەس بەندکەک کەسک و سۆر بوویا، وێ ب سەرێ دەرێ مالا باڤێ خوە ڤە بوویا”، هه‌گه‌ر رەژێما سووریێ ژی باوه‌رى ب مافێن كوردان هه‌بوویا‌؟ گەلۆ چما چاڤێ خوە نه‌ددا كوردێن ل رۆژئاڤا كوردستانێ د ژیان؟

د دەمەکی دە کو دەستهلاتا سووریێ ولاتێ خوە وەکە هۆتێلەکە 5 ستێر خستبوو د خزمەتا عەڤدللا ئۆجالان و پەکەکێ دە، کوردێن ل رۆژئاڤا دژین وەکە کۆلە ددیتن و ت ماف ب وان نەددا، د ڤی دەمی دە ل سووریەیێ کوردان ت مافەکی مولکداریێ تونەبوو، کورد نەدکارین پاسەپۆرتا سووریێ ب دەست بخن و وەکە قەرەچ دهاتن ناسکرن، رێ ب ت چالاکیەکە سیاسی ب کوردێن رۆژئاڤا نەدهات دایین، تەڤ چالاکیێن چاندی و زمانی ژ کوردان رە قەدەغە کربوون، رێ ب پارتیێن سیاسی یێن باشوور ژی نەدهات دایین خەباتێن خوە یێن سیاسی ب ئەشکەرە ل ور ئەنجام بدن.

لێ بەلێ، بەرەڤاژی ڤێ یەکێ، ده‌وله‌تا سووریێ ب هەموو ئاوایان ئالیکاریا پەکەکێ دکر، ژ وان ئالیکاریان ژی مینا، “دەورەیێن پەروەردەهیا لەشکەری ژ بۆ پەکەکێ ل دار دخستن و جەنەرالێن رەژێما سووریێ ب پەروەردەیێ رادبوون، دەورەیێن سیاسی و چاندی ژ بۆی پەکەکێ ڤەدکرن و رێ ب تەڤ چالاکیەکە هونەری ددا،  پاسەپۆرت ژ کادرۆیێن پەکەکێ رە ددان هەژمارا هەری زێدە یا کادرۆیێن پەکەکێ یێن د ناڤبەرا سالێن 1981-1991ان دە دەرباسی ئەورۆپایێ بووی ب پاسەپۆرتا سووری و ژ شامێ دەرباس بوونە، ئالیکاریێن مادی یێن مەهانە پێشکێشی پەکەکێ کرنە، چەک ژ چەکدارێن پەکەکێ رە دابین کرنە و پەکەکێ ب ئاوایەکی ئازاد تەڤ جڤین و کۆنفەرانسێن خوە ب ئازادی ل دار دخستن و پەکەکێ رۆژنامە و کۆڤار و رادیۆ ب ئەشکەرایی د ناڤا خاکا سووریێ دە هەبوون.

 رەژێما سووریێ هن ئارمانجێن خوە یێن سیاسی هەبوونە کو ب ڤی ئاوا ئالیکاریا پەکەکێ کریە، ب نەرینا من ژ وان ئارمانجان ژی ئەڤن،

1- ب رێیا پەکەکێ تەڤ پارتیێن کوردی یێن رۆژئاڤا کوردستانێ ژ ناڤ ببە.

2- جوانێن رۆژئاڤا کوردستانێ یێن نەتەوی تەڤلی رەفێن پەکەکێ بکە و ژ بۆی شەرێ چەکداری بشینە ترکیێ هەیا کو تەڤ بهێن تەسفیەکرن.

3- تێگەها کو رۆژئاڤا کوردستانێ بەشەک ژ کوردستانا مەزنە ژ ناڤ ببە و ووسا ب کوردان بدن زانین کو ت کوردەکی رۆژئاڤا تونەیە و ت پارچەیەک کوردستانێ ل سووریێ تونەیە، کوردێن ل ور تەڤ ژ باکور کۆچبەری رۆژئاڤا بوونە، ئۆجالان د ڤێ دەربارێ دە هەولەک مەزن دا.

4- پەکەکێ وەکە ئاموورەکی گڤاشێ ل دژی دەولەتا ترکیێ بکار بینە.

 خویایە کو ناکۆکیێن پڕ مەزن د نێڤبەرا سووریێ و ترکیێ دە هەبوونە، ئەز دکارم وان ناکۆکیان ب کورتاسی ب ڤی ئاوا باس بکم :

1- پرۆژێ گاپ یێ کو حكوومه‌تا تركیێ راگهاندی و هەیا نها ژی كار ل سه‌ر دكه‌ كو چه‌ندین به‌نداڤێن مەزن ل سه‌ر رووبارێ دیجله‌ و فورات ئاڤا بکە،  ئەڤ دبوو سەدەم کو بەشەکی مەزن ژ خاکا سووریێ وەکە بیابان هشک ببە.

2- ترکیێ رێخستنەک سیاسی یا ئیسلامی ژ گەلێ سووریێ ئاڤا کربوو و بەردەوام چالاکیێن لەشکری ل دژی رەژێما سووریێ ئەنجام ددان، ئەڤ یەک ژی گەفەکە مەزن بوو ل سەر رەژێما سووریێ.

3- دەما د سالا 1939ان دە ژ ئەنجاما راپرسینەکێ دە پارێزگەها ئەسکەندەریە چووی ب سەر ترکیێ ڤە، ت جاران حکوومەتا سووریێ ئەڤ راپرسی ئەرێ نەکر و هەر تم د وێ باوەریێ دە بوویە کو وێ پاریزگەهێ دێ ڤەگەرینە ناڤا سینۆرێ خوە دە.

ل داویێ دخوازم بالا وە ژ بۆی ئاخافتنەکا یەک ژ بەرپرسێن پەکەکێ یێن ب ناڤێ چەلیک راکێشم، چه‌لیك یه‌ك ژ بەرپرسێن له‌شكه‌رى یێن پەکەکێ بوو، وی دگۆ: “یا زەلال و ئەشکەرە یە د دیرۆکا پەکەکێ دە، مه‌ ت چالكیه‌ك له‌شكه‌رى یان سیاسیى یان روشه‌نبیرى ل دژى حكوومه‌تا سوورى ئەنجام نەدایە و ئەمێ ئەنجام نەدن ژی.”