ئامەریکایێ رێ ل گەھشتنا بارەکێ پری چەکێ ئیرانێ ژ بۆ حووسیان گرت

فەرماندەیا ناڤەندی یا ئامەریکایێ (سێنتکۆم) ئەشکەرە کر کو، رۆژا 28 چلەیێ ل دەریایا عەرەبی کەشتیەک بندەست کریە، کو چەک و تەقەمەنیێن ئیرانێ تێ دە بوون و بەر ب دەڤەرێن ل بن دەستێ حووسیێن یەمەنێ ڤە دچوو.

فەرماندەیا ناڤەندی یا ئامەریکایێ (سێنتکۆم) ئیرۆ (پێنجشەم، 25/2/2024) راگەھاند کو، رۆژا 28 چلەیێ ل دەریایا عەرەبی کەشتیەک بندەست کریە، کو زێدەتری 200 پارچەیێن چەک و تەقەمەنیێن ئیرانێ تێ دە بوون و بەر ب دەڤەرێن ل بن دەستێ حووسیێن یەمەنێ ڤە دچوو.

د وێ راگەھاندنێ دە ھاتیە، “ئەو چەک و تەقەمەنیێن ھاتنە بندەستکرن ژ مۆشەکێن بالستی یێن مەودا ناڤنجی، تەقەمەنی، پارچەیێن درۆنان، سیستەما دژەتانک و ئاموورێن پەیوەندیکرنێ پێک تێن”.

فەرماندەیێ فەرماندەیا ناڤەندی یا ئامەریکایێ مایکل ئێریک ژ ئالیێ خوە ڤە دیار کر، “ئیران ل سەر دابینکرنا چەک و تەقەمەنیان ژ بۆ حووسیێن یەمەنێ بەردەوامە، ئەڤ ژی بنپێکرنا یاسایێن ناڤدەولەتی یە”.

ناڤبری ھەروەسا ئاماژە دا، “ژ بۆ بەرھنگاربوونا بزاڤێن ئیرانێ ل دەڤەرێ، ھێزێن ئامەریکایێ ل سەر کارکرنا ب ھەڤپارێن خوە رە پابەندن”.