ترکیێ زێدەتر ژ 300 پەنابەرێن دن یێن سووری دەرسینۆر کرن

دەستھلاتێن ترکیێ د 48 دەمژمێرێن بۆری دە، پتر ژ 300 پەنابەرێن سووریێ دەرسینۆری باکورێ سووریێ کرن.

رەوانگەھا سووری یا مافێن مرۆڤان بەلاڤ کر، دەستھلاتا ترکیێ زێدەتر ژ 300 پەنابەرێن سووری ل ناڤچەیێن جودا گرتن و د دەریێ باب ئەل-ھەوا ل پارێزگەھا ئدلبێ و دەریێ باب ئەل-سەلامێ یێ ل عەزازێ رە دەرسینۆر کرن.

ل گۆری زانیاریان، پرۆسەیا دەرسینۆرکرنێ ب بەهانەیا وێ یەکی نە کو کەسێن ھاتنە گرتن، بەلگەیێن وان یێن پاراستنا دەمکی (کیملک) تونە نە.

ژ سالا بۆری ڤە حکوومەتا ترکیێ رۆژانە ھەژمارەک پەنابەرێن سووری ڤەدگەرینە ھەرێمێن ئدلب، عەزاز، سەرێ کانیێ و گرێ سپی.

ل گۆری رایەدارێن ترکیێ، کەسێن کو بەلگەیێن وان یێن یاسایی، چ کارتێن پاراستنا دەمکی و چ ژی مافێ روونشتنا دەمکورت نینن، تێن دەرسینۆرکرن.

لێ چالاکڤانێن سووری ژی دبێژن، پرۆسەیا ڤەگەراندنا پەنابەران ب دارێ زۆرێ تێ کرن و بانگ ل جڤاکا ناڤدەولەتی دکن کو ب ئەرکێ خوە ل ھەمبەر ڤێ رەوشێ رابن.