داییکا کوردا ب ناڤێ س.چ یا 80 سالی ل بالافرگەھا ستەنبۆلێ، ژ بەر کو زمانێ ترکی نەدزانی 2 دەمژمێر و نیڤان ھات راگرتن.
کورێ دایکا کورد گۆت، “بلا ئەڤە شەرما ترکیێ بە.”
ل بالافرگەھا ستەنبۆلێ، س.چ یا کو ژ پارێزگەھا وانێ ب بالافرێ چوو ستەنبۆلێ ژ بەر کو زمانێ ترکی نەدزانی و کارمەندەکی کو ب کوردی دززانی ل بالافرخانەیێ نەبوو 2 دەمژمێر و نیڤان ھات راگرتن.
کورێ دایکا کورد دیمەنێن خوە و دیا خوە ل بالافرخانەیێ بەلاڤ کرن و نەرازیبوونا ل ھەمبەری دژایەتیا کوردی نیشان دا.
دایک ژی د دەما ھێرسبوونا کورێ خوە دە ب کوردی دبێژە، “تشتەک نابە ئەز قوربان.’
وەلاتیێ کورد وھا گۆت: “بنێرن، من ل بالافرگەھا ستەنبۆلێ یا کو دبێژن سێیەمین مەزنترین بالافرگەھا جیھانێ یە، ب کەسەکی نەدا فێمکرن و نکاری دایکا خوەیا رەبەن 2 دەمژمێر و نیڤان دربخم. چما؟ ژ بەر کو زمانێ ترکی نەدزانی، خوەندن و نڤیساندن نەدزانی. ل وەلاتێ من، کارمەندێ بالافرخانەیێ کو ئەز باجا وێ ددم ژ من رە نەبوو ئالیکار.
دایکا من 2 دەمژمێر و نیڤان ل ڤێ دەرێ وەک دیل هاتیە راگرتن، من نکاربوو وێ ژ بالەفرخانەیێ دەربێخم. زمانێ عەرەبان ھەیە، زمانێ ئازەریان ھەیە، زمانێ ئینگلیزان ھەیە لێ زمانێ دایکا من نینە.
دایکا من نەکاری خوە بدە فێمکرن و من نەکاری 2 دەمژمێر و نیڤان وێ ژ پشت ڤی دەری دەرخینم. بلا ئەڤ ژی شەرما ترکیەیێ بە، دێ سبە دەنگان ژ مە بخوازن و بێژن ئەم برا نە.”
