بەشا دویەم: گەلۆ ئۆجالان رێبەرێ چیە؟
جه‌ماوه‌رێ کو ل دەردۆرا په‌كه‌كێ کۆم بوویە، ل هەمبەری هەر رەخنە و شرۆڤەیێن نەپەژراندی یێن ل سەر عەڤدلا ئۆجالان تێن کرن، كارڤه‌دانه‌ك توند نیشان ددە. گەر هوون ئۆجالان رەخنە بکه‌ن دو رێ ل پێشییا وە هەنە: یا یەکەم هوون ئۆجالان ناس ناکه‌ن، هوون نەزانن. یا دویەمین ژی؛ هوون سیخۆرێن میتێ نە و ژ بۆ دەولەتا ترک دخەبتن. دەڤ ژێ بەر کو مرۆڤ بێژە «ئۆجالان سیخۆرێ دەولەتا ترکە»، چ ڤەبژارکەک وەکی «من ل ژیان، فکر و پراتیکا ئۆجالان لێکۆلین کر، لێ من ژێ حەز نەکر» نینه. هەگەر تو بیانی بی، نە کورد بی، دێ هنەکی نەرمتر نێزی تە دبن، لێ هەگەر تو کورد بی، تو دێ ئۆجالان ته‌واف بکه‌ی، وەکی دی چ رێ ل پێشییا تە نینن. گەر تو ئۆجالان تەواف نەکه‌ی، به‌یعه‌ت نەکه‌ی ژ بۆ تە تاوانەکا مەزنە، دێ تو هێیه بێبه‌هر كرن یان ژی کوشتن.
یەک ژ کەسایەتیێن گرنگ یێن په‌كه‌كێ مستەفا قاراسوو د دەربارێ ئۆجالان دا وه‌ها دبێژە: «ئەز ملیتانێ خەلەتیێن سەرۆک ئاپۆ مە ژی». قاراسوو نە کەسەکێ نۆرمالە. قاراسوو کەسەکه کو د مژارێن ئیدۆلۆژیک یێن په‌كه‌كێ دا مەرجه‌عێ پیڤانێ یە، لەوما تشتێ کو قاراسوو دبێژە دڤێت ئەندام و سەمپاتیزانێن په‌كه‌كێ بجهـ بینن. ل گۆری ڤێ یەکێ، دڤێت کادر و هەموو پێکهاتەیێن په‌كه‌كێ، سڤیل ژی د ناڤ دا، تشتێن کو ئۆجالان خەلەت ژی دبێژیت بپارێزن و گومانێ ژ گۆتنێن وی نەکه‌ن. چه‌وا ژ بۆ خودێ شریک گونەهە، شکبرنا ل سەرۆکاتیا ئاپۆ ژی جه‌زایێ وێ مه‌زنه. واته په‌یوه‌ندییا به‌رێ یا ئۆجالان ل گه‌ل میتێ، هەڤژینا وی کەسیرە یلدرم كو کەچا ئەندامەکێ میتێ یە و رابردوویا وی ب تاری حه‌ساب ژی نه‌كه‌ن، هوون نکارن فکرەکا ئاپۆ خەلەت ببینن.
وەک کو مستەفا قاراسوو گۆتیە، «ئۆجالان خەلەت ژی بێژە هوونێ ئۆجالان بپارێزن». د ڤان سالێن داویێ دا هنه‌ك ژن د ناڤا په‌كه‌كێ دا دەرکەتن ئۆجالان وەک «پێغەمبەر» راگهاندن. ئەڤ هەلوەستا ڤان ژنان ب وێ پەرگالا ئاپۆچی ڤە گرێدایی یە.
بەلێ، سیستەما په‌كه‌كێ ل سەر ڤێ هاتیە ئاڤاکرن: پیرۆزکرنا ئۆجالان. ئۆجالان ب خوە ئەڤ سیستەما پیرۆز ئاڤا کر. ئۆجالان ئەڤ سیستەم ل سەر ترسێ و بەرژەوەندیێن پشدار ئافراندیە. واته سیاسەتا قامچی و شەکرێ دمەشینە.
هوون چقاس ئۆجالان پیرۆز بکه‌ن، د ناڤ په‌كه‌كێ دا جهێ وە دێ ئەو قاس بەرز و باش بیت و هوون دێ ژ مفایێ دەستهلاتێ سوودمەند بن. گۆتنا مستەفا قاراسوو یا «ئەز ملیتانێ خەلەتیێن سەرۆکم» د راستیێ دا پاراستنا جانێ خوە یە. ژ بەر کو ئه‌و باش دزانە هەڤالێ وی یێ ل گرتیگەهێ «مەهمەت شەنەر» یێ کو ل گه‌ل وی کەتبوو د گرەڤا برچیبوونێ دا، تەنێ ژ بەر کو «ستراتیژیا سیاسی – لەشکەری یا ئۆجالان رەخنە کربوو هات کوشتن». قاراسوو یێ كو نه‌شێت ب تنێ چ کارەکێ لەشکەری و سیاسی بکەت، هەتا ب ب تنێ نه‌شێت چایه‌كێ بۆ خوه چێبكه‌ت، لێ مخابن ژ سالا 1991ێ پشتی ژ گرتیگەهێ دەرکەتی و هه‌تا نوکە خەباتکارێن په‌كه‌كێ وی ل سەر پشتا خوە دگێرینن و ژ بۆ پاراستنا وی دمرن. قاراسوو ئەڤ پۆستە ب دانا دلسۆزییا بێسینۆر بۆ ئۆجالان ب دەست خست.
ئەڤ په‌یوه‌ندیا دەستهلات و تەوافێ کو ئۆجالان ئاڤا کریە ل هەر دەرێ كارتێكرنێ دکەت. دەما کو ئۆجالان ل شامێ بوو، کادرێن ژن یێن کو ل دۆرا وی کۆم دبوون، ب قه‌ده‌ر وێ پەسنا وان ددا د بوونه خودان پلە و پۆست. یێن کو پەسنا ئۆجالان نەدان ژی، د هنارتن جهێن کو پەڤچوون لێ دژوار بوون دا بێن کوشتن. یان ژی هەتا داویا ژیانا خوە بێ پلە و ئەرک دمان. ژ بەر ڤێ هێرسا دەستهلاتداری کادرێن ژن یێن په‌كه‌كێ هەڤدو دشکاندن و هەڤرکییا هەڤ بۆ پەسنا ئۆجالان دکرن.
د پەروەردەیا ئۆجالان دا فەرماندارێن زه‌لام ل بەر ئۆجالان رادوەستیان و بێرێزی ب خوه دكرن، ئۆجالان ژی ل سەر ڤی ئەساسی دگۆت: «ب رێبەرتیێ ڤە گرێدایی، ژێهاتی و ژ بۆ پێشکەتنێ ڤەکریە» و ئەو ئەرکدار دکرن.
ئەڤ سیسته‌م هێژ ژی بەردەوامه، ژ عەبباس هەتا جومعا «جەمیل بایک» هەر کەس دزانیت کو ئەگەر ئۆجالان رەخنە بکەن دێ ئەو به‌رزه بن. کارمەندێن په‌كه‌كێ یێن ل ترکیێ ژ بۆ کو نەچنه چیایان و د ناڤا شەرت و مەرجێن رحه‌ت دا بژین دڤێت چالاکیێن هەره رادیکال ل سەر ناڤێ ئۆجالان بکه‌ن. دڤێت په‌رله‌مانتارێن هه‌ده‌پێ و پارتیێن دی ب ناڤێن جودا پەسنا ئۆجالان بده‌ن، بەشداری مەشان ببن و ل بەر چاڤێن قەندیلی خوە شرین بکه‌ن دا کو ببنه په‌رله‌مانتار و شارەدار. خەباتکارێن په‌كه‌كێ یێن ئەورۆپایێ ژ بۆ کو نەچنه چیایی بێسینۆر پاسدارییا ئۆجالان دکه‌ن. کەسێن کو ل ئەورۆپایێ یێن ژ بەر دەولەتا ترک رەڤیانە و مافێ پەنابەریێ دخوازن، د تەلەڤیزیۆنا په‌كه‌كێ دا پەسنا فکرێن ئۆجالان دده‌ن، پرۆسه‌یا پەنابەریا وان هێسانتر دبیت و ژ دەرفەتێن ئابۆری سوودێ وەردگرن. کەسێن کو ئۆجالان رەخنە دکه‌ن، ل ترکیە و ئەورۆپایێ ب تەجرید و گەفێن ئابۆری و جڤاکی روو ب روو دمینن و وەک خائین تێن بناڤکرن. ژ بەر ڤێ یەکێ شەرتێ یەکەم یێ په‌كه‌كه‌یی بوونێ سووندخوارنه ب ئۆجالان. هوون کی بن بلا ببن گاڤا وە سووند ل سەر ناڤێ ئاپۆ خوار پێشییا وە ڤەدبیت و دەرفەت تێنه دان. یێن کو زێدە پەسنا ئۆجالان دده‌ن تریاکفرۆش، چەتە-مافیا و هەتا سیخۆرێن دەولەتا ترکن.
ئەم ژ بیر نەکه‌ین کەسێ ب ناڤێ عۆمەر گوونەیێ کو ل پاریسێ ساکینە جانسز، فیدان دۆگئام و لەیلا شایلەمەز کوشتبوون، ئەو کەسێ کو وێنەیێ ئۆجالان ل کولەیا ئەیفەلێ یا پاریسێ هه‌لاویستی. ژ بەر ڤێ یەکێ هوون چقاس تاوانبار ژی بن هوون پەسنا ئۆجالان بده‌ن چ کێشە نابن.
ژ بلی خەتا سیاسی و په‌یوه‌ندیێن وی یێن ل گه‌ل دەولەتا ترک، ئۆجالان کەسایەتەک نه‌خوه‌ش «نه‌ساخه». ئۆجالان مرۆڤەکێ مەگالۆمانە، پسیکۆپاتە، پراگماتیست و ژ نرخێن ئەخلاقی بێپارە. پرەنسیبا وی تەنێ خوە ئیلاهـ دیتن و ئافراندنا ناڤێ خوە یە. خوە ب سیفاتێن ئیلاهی پێناسەکرن ئەگەرا ڤێ نەخوەشیێ یە. خوە وەکە خولقدار- پیرۆز قەبوول دکەت و دخوازیت هەر کەس ژی وی وه‌سا قەبوول بکەت. ئۆجالان پشتی کو كار ب رێهەڤالێن خوە نەمای، وان ژ پشت ڤە خەنجەر دکەت و رێکا خوە ڤەودژێریت. ئۆجالان ژ سەدی 50 زێدەتر رێهەڤالێن خوە یێن دامەزرێنه‌ر قەتل کرن.
گەر ئۆجالان نەهاتبا گرتن، ئه‌و دا هه‌تا نوکە جەمیل بایکی و دوران کالکانی ژی هاڤێته د تانەکا گلێشێ په‌كه‌كێ دا.
ئۆجالان ب ڤێ کەسایەتیا «نه‌ساخ» ڤە نه‌شێت رێبه‌ریێ بۆ کوردان بکەت. په‌كه‌كه ب هزاران درووشم، وێنە، جورێن پرۆپاگاندا و ماسکەیان ڤە هەول ددەت کو کەسایەتیا ئۆجالان یا نەخوەش و خەتا وی یا سیاسی یا ب گومان ڤەشێریت.
کولیلکێن هەره جوان د سروشتی دا ئەون یێن کو هه‌ره ب ژەهرن. ئەڤ کولیلکە ب جوانییا خوە ژەهرا خوە ڤەدشێرن. جڤاک ژی ڤێ تایبەتیا خوەزایێ ب کار دئینیت. فکرێن پر خەتەرناک دشێن ب پەیڤ و خەملاندنێن ئەدەبی خوە ڤەشێرن. ئه‌و قاس پیرۆزکرنا ئۆجالان تەنێ ژ بۆ ڤەشارتنا روویێ وی یێ راستینه. میناک تێ گۆتن کو ئۆجالان بەرخوەدانڤانە. لێ بەلێ ئۆجالان ئەو کەسە یێ کو نه‌شێت یەک ده‌مژمێر برسی بمینیت و ئەو قاس نەوێرەکە نه‌شێت یەک فیشەک ژی بتەقینە. هەموو دنیا و عاله‌مێ دیت کا وی ل ئیمرالییێ چ خیانەت ل پارتییا خوە و دلسۆزێن خوە کر.
دبێژن ئۆجالان دێ کوردستانێ رزگار كه‌ت. لێ د رێخستنا ئۆجالان دا ئاخفتنا ب کوردی پاشڤەروویی یه و کوردایەتی کرن ژی ب گوندیاتی تێ دیتن. د پارادیگمایا ئۆجالان دا عەشیرەت، مەزهەب، پێکهاتەیێن ئۆلی، تایبەتمەندیێن کەسایەتی و چاندا جڤاکی یا ل سەر کوردایەتیێ هەر ده‌م دهێنه بێرێزکرن. ئۆجالان پارچەکرنا جڤاکا کورد ئەساس دگریت.
دڤێت ب ئاوایەکی ڤەکری ئەم بێژن؛ کو چه‌ند دخوازن جه‌ماوه‌ری كۆم بكه‌ن، درووشمان بقیرن، وێنەیان بلند بکه‌ن و کلیپێن خوەش چێکه‌ن ژی، یەک ژ ڤان کریاران ژی تێرا ڤەشارتنا پسیکۆلۆژیا نەخوەش یا ئۆجالان و خەتا وی یا خیانەتێ ناکەت. جهێ ئۆجالان د دیرۆکا کوردستانێ دا دێ ل گه‌ل خاینان بیت، د ناڤا رێزا شێخ سەعید، قازی محه‌مه‌د و سەید رزا دا، یێن کو ل پێشبەری دژمنی خوه نه‌چه‌ماندین، جهێ ئۆجالان نینە. د دیرۆکێ دا جهێ ئۆجالان دێ ل کێلەکا خائینێن وەک دیاپ ئاغا و رایبەر بیت.
دیسا ئەم دبێژین ئۆجالان نە سەرۆکێ کوردایە، ئۆجالان نە سەرۆکێ گەلە. ئۆجالان سەرۆکێ خەتا دژمن و سەرۆکێ خەتا خیانەتێ یە.
