فەرماندەیا ناڤەندی یا ھێزێن ئامەریکایێ (سێنتکۆم) رادگەھینە، ب ھەڤپاریا ھێزێن بریتانیایێ و پشتەڤانیا کانادا، بەحرەین، ئوسترالیا، ھۆلاندا و نیوزلاندایێ، 18 بنگەھێن حووسیێن نێزی ئیرانێ ل ناڤ ئاخا یەمەنێ بۆمبەباران کرنە.
فەرماندەیا ناڤەندی یا ھێزێن ئامەریکایێ (سێنتکۆم) راگەھاند، ئیرۆ یەکشەمێ، 25/2/2024 ب ھەڤپاریا ھێزێن بریتانیایێ و پشتەڤانیا کانادا، بەحرەین، ئوسترالیا، ھۆلاندا و نیوزلاندایێ، 18 بنگەھێن حووسیێن نێزی ئیرانێ ل ناڤ ئاخا یەمەنێ بۆمبەباران کرنە.
ل دوو گۆتنێن فەرماندەیا ناڤەندی یا ھێزێن ئامەریکایێ (سێنتکۆم)، “ئەو بنگەھێن حووسیان، یێن کو ھاتنە بۆمبەبارانکرن، ژ بۆ ئێریشکرنا ل سەر کەشتیێن بازرگانی ل دەریایا سۆر ھاتنە بکارانین”.
سێنتکۆمێ ئەشکەرە ژی کر، د ئێریشا ڤێ جارێ دە عەمبارا چەکی یا حووسیان ل بن ئەردی وێران کریە، زێدەباری نەھێلانا عەمبارا مۆشەک و درۆنێن وێ کۆمێ.
ئارتێشا ئامەریکایێ ئیرانێ ب پشتەڤانیکرنا حووسیێن یەمەنێ تۆمەتبار دکە و راگەھاندیە، ل سەر کەشتیێن بازرگانی و ھێزێن ئامەریکایێ ل دەڤەرێ بوونە گەفەکا راستەراست.
حووسیێن یەمەنێ ل رۆژا 19 مژدارا 2023 ل دەریایا سۆر و دەریایا عەرەبی، وەکی پشتەڤانیەک ژ بۆ چەکدارێن حەماسێ و چێکرنا گڤاشتنەکا ناڤدەولەتی ژ بۆ راوەستاندنا ئێریشێن ئیسرایلێ ل سەر غەززەیێ، ئێریشێن خوەیێن ل سەر کەشتیێن بازرگانی دەست پێ کرنە.
ل بەرانبەری وێ یەکێ، ھێزێن ئامەریکا و بریتانیایێ ل رۆژھلاتا ناڤین و دەریایا سۆر ژ 12 چلەیا ئیسال ڤە بنگەھ و پشتەڤانیێن لۆجستی یێن چەکدارێن حووسی دکن ئارمانج.
