جڤینێن سەرۆکێ حکوومەتا ھەرێما کوردستانێ ل واشنتۆنێ دەست پێ دکن و ئیرۆ لگەل وەزیرێ دەرڤەیێ ئامەریکایێ دجڤە.
مالپەرا وەزارەتا دەرڤەیا ئامەریکایێ بەلاڤ کریە کو، ئیرۆ دوشەمبێ 26/2/2024 دەمژمێر 11:00 سبەھێ ب دەما واشنتۆنێ و دەمژمێر 7:00 ئێڤارێ ب دەما ھەولێرێ، وەزیرێ دەرڤەیێ ئامەریکایێ ئانتۆنی بلنکەن دێ پێشوازیا سەرۆکێ حکوومەتا ھەرێما کوردستانێ مەسروور بارزانی بکە.
ل گۆر وێ مالپەرێ، سەرۆکێ حکوومەتا ھەرێما کوردستانێ مەسروور بارزانی ل رۆژا شەمبی، 24/2/2024، ب ڤەخواندنەکا فەرمی گەھشت واشنتۆنا پایتەختا ئامەریکایێ.
وێ مالپەرێ ھەروەسا راگەھاندیە، سەرۆکوەزیر مەسروور بارزانی دێ د ڤێ سەردانێ دە ھەژمارەکا جڤینان لگەل بەرپرسێن بلندێن ئامەریکایێ ل کۆچکا سپی و وەزارەتا دەرڤە و کۆنگرێسێ بکە.
تەوەرێ سەرەکی یێ وان جڤینان ژی دێ ل سەر زێدەتر پێشخستنا پەیوەندیێن ھەرێما کوردستانێ و ئامریکایێ و داوی گوھەرتن و پێشڤەچوونێن رەوشا گشتی یا ئیراقێ و دەڤەرێ بە.
وەزیرێ پێشمەرگە و بەرپرسێ فەرمانگەھا پەیوەندیێن دەرڤە و چەند بەرپرسێن دنێن حکوومەتا ھەرێما کوردستانێ د ڤێ سەردانێ دە یاوەریا سەرۆکوەزیر مەسروور بارزانی دکن.
