حزبوللاھا لبنانی رادگەھینە کو چەکدارێن وان ل دەڤەرا بەغدادیێ ل کنارێ باکورێ ئیسرایلێ ب مۆشەکان ئێریش کریە سەر ھێزێن ئیسرایلێ.
کۆما حزبوللاھا لبنانی د بەیاننامەیەکێ دە ل سەر پلاتفۆرما تەلەگرامێ راگەھاند کو، ئیرۆ دوشەمبێ 26/2/2024 چەکدارێن وان ل دەڤەرا بەغدادیێ ل کنارێ باکورێ ئیسرایلێ ب مۆشەکان ئێریش کریە سەر ھێزێن ئیسرایلێ.
ئاماژە ژی دا، “ئارمانجکرنا ھێزێن ئیسرایلێ ژ بەر پشتەڤانیا مەیە ژ بۆ گەلێ فلستینێ ل کەرتێ غەززەیێ”.
ئارتێشا ئیسرایلێ ژی سەرێ سبەھا ئیرۆ راگەھاند کو، ل باکورێ ئیسرایلێ زەنگا ھایدارکرنێ ھاتیە لێدان. ھەروەسا مەدیایێن ئیسرایلێ ئاماژە دا کو، ل دەڤەرێن مەجدەل شەمس، مەسەدە و جۆلانێ ژی زەنگا ھایدارکرنێ ھاتیە بھیستن.
رەوانگەھا سووریەیی یا مافێن مرۆڤان دۆھ یەکشەمبی 25/2/2024 ئاماژە دا کو، ئسرایلێ ب مۆشەکەکێ بارھلگرەکا مەدەنی ل نێزی سینۆرێ سووریێ و لبنانێ کریە ئارمانج، کو ب کێمی ڤە دو کەس ھاتنە کوشتن. ھەروەسا گۆت، “ئەو ھەر دو کوشتی لبنانی نە و گرێدایی حزبوللاھا لبنانی بوون”.
پشتی دەستپێکرنا شەرێ غەززەیێ، دەڤەرێن سنۆری یێن ناڤبەرا سووریێ و لبنانێ بوونە جھێ شەر و ئالۆزیێن ناڤبەرا ئارتێشا ئیسرایلێ و کۆما حزبوللاھا لبنانی.
