ئیسرایل ئیرۆ بەربانگێ زنجیرە ئێریشێن ئاسمانی ل سەر ئیرانێ پێک ئانین و دەنگێ تەقینان ل تەھرانێ، پایتەختا ئیرانێ ھات بھیستن، لێ ت ئاگاھی دەربارێ زەرەر و زیانان نەھاتن راگھاندن.
پشتی 4 دەمژمێران ژ دەستپێکرنا ئۆپەراسیۆنا کو ئیسرایلێ ناڤێ “رۆژێن بەرسڤدانێ” لێ کریە، ئارتێشا ئیسرایلێ راگھاند، وان ئێریشا ل دژی ئارمانجێن لەشکەری یێن ل ئیرانێ تەمام کریە و ھەموو فرۆکەیێن وێ یێن کو ئێریش ل سەر ئیرانێ پێک ئانینە، ب ساخی ڤەگەریان بارەگەھێن خوە و ئۆپەراسیۆنێ ھەموو ئارمانجێن خوە پێک ئانینە.
بەردەڤکێ ئارتێشا ئیسرایلی دانیل ھەگاری راگەھاند، ئەڤ ئێریش ب راسپاردەیا ل سەر ئاستا سیاسی وەکە بەرسڤەکێ ل ھەمبەر ئێریشێن ئیرانێ یێن ل دژی ئیسرایل و وەلاتیێن وێ ھاتیە پێکانین.
رایەدارەکی پایەبلندیێ ئامەریکی ژی گۆت، بەرسڤا ئیسرایلێ یا ل سەر ئیرانێ ب داوی بوویە و ژ تەھرانێ خوەست کو بەرسڤێ نەدە و توندیێ نەکە و تەکەز کر: “ئەگەر ئیران بریارا بەرسڤدایینێ بدە، ئەم دێ ئیسرایلێ بپارێزن و دێ ئەنجامێن خراب ھەبن.”
ھەروھا گۆت ژی، دڤێت ئەڤ یەک ببە داوییا پەڤگوھەرتنا ئێریشێن راستەراستێن د ناڤبەرا ئیسرایل و ئیرانێ دە.
ئێریشا ئیسرایلێ ل سەر تەھرانێ ئیرۆ دەمژمێر 2:00 دەست پێ کر و بەردەڤکێ ئارتێشا ئیسرایلێ دانیل ھەگاری دەستپێکرنا ئێریشەکە ھوور و ئارمانجکری ل سەر ئیرانێ راگھاند.
مالپەرا “Axios” یا ئامەریکی ل سەر زارێ بەرپرسێن ئیسرایلی و ئامەریکی بەلاڤ کر، ئیسرایلێ ب سێ پێلێن ئێریشان ئیران کریە ئارمانج و یەکەم پێلێن وان ئێریشان ژی سیستەما بەرەڤانیا ئاسمانی یا ئیرانێ بوو.
پشتی 4 دەمژمێران ژ ئێریشێ، ئیسرایلێ بداویھاتنا ئێریشا ل سەر ئیرانێ راگھاند، کو تێ دە ب سەدان فرۆکەیێن شەرکەر بەشدار بوون. “زە نیۆیۆرک تایمس” ژی ژ زارێ بەرپرسێن ئیسرایلی راگھاند، ئیسرایلێ ل 20 ئارمانجێن ئیرانێ دایە.
ئەڤ ئێریشا ئیرسرایلێ پشتی وێ تێ، رۆژا 1 جۆتمەھێ تەھرانێ راگھاندبوو، وان زێدەتری 180 مووشەک ئاڤێتن ئیسرایلێ و سێ بارەگەھێن ئاسمانی یێن ئیسرایلێ کربوون ئارمانج، وەک بەرسڤەکێ ل سەر کوشتن رێبەرێ حەماسێ ئیسماعیل ھەنیە ل تەھرانێ.
