ئارتێشا ئه‌مه‌ریكایێ رادگەهینە کو، سێ بەلەم و دو مۆشەکێن کرۆز یێن دژەکەشتی پووچ کرنە، کو ژ ئالیێ حووسیێن یەمەنێ ڤە هاتبوون ئامادەکرن و دێ بەر ب دەریایا سۆر ڤە هاتبان بکارئانین.
فەرماندەیا ناڤەندی یا ئارتێشا ئه‌مه‌ریكایێ (سێنتكوم) ئیرۆ (سێشەم، 27.02.2024) ل سەر تۆرا جڤاکی یا X راگەهاند کو، سێ بەلەم و دو مۆشەکێن کرۆزێن دژەکەشتی و درۆنەک ل دەریایا سۆر پووچ کرنە کو ژ بۆ بکارئانینێ هاتبوون ئامادەکرن.
فەرماندەیا ناڤەندی یا ئارتێشا ئه‌مه‌ریكایێ هەروەسا ئاماژە دایە، «هەمی جورێن چەکان مەترسیێ ل سەر کەشتیێن بازرگانی و کەشتیێن هێزێن دەریایی یێن ئه‌مه‌ریكایێ ل دەڤەرێ چێ دکن».
هەفتیا بۆری حووسیێن یەمەنێ هایداریەکا فەرمی ژ بۆ بەرپرسێن هەمی کەشتیڤانی و کۆمپانیێن بیمەیێ شاندیە، ژ بۆ کو ل سەر وان کەلووپەلێن قەدەغەکری بێن هایدارکرن، کو کەشتیێن پەیوەندیدارێن ئسرائیل و ئه‌مه‌ریكا و بریتانیایێ نێزی دەڤەرێ دبن و دبێژە «ئەم دێ وان پووچ بکن».
هەروەسا حووسیێن یەمەنێ گەفا وێ یەکێ ژی کریە کو دێ بندەریایان ژ بۆ ئێریشێن خوە ب کار بینن، ڤێ یەکێ ژی نیگەرانی ل سەر ئارمانجکرنا هێلێن ئنتەرنێتێ چێ کریە، کو د وێ دەرێ رە دەرباز دبن.
حووسیێن یەمەنێ ل رۆژا 19ێ مژدارا 2023ێ ل دەریایا سۆر و دەریایا عەرەبی، وەکی پشتەڤانیەک ژ بۆ چەکدارێن حەماسێ و چێکرنا گڤاشتنەکا ناڤدەولەتی ژ بۆ راوەستاندنا ئێریشێن ئسرائیلێ ل سەر غەززەیێ، ئێریشێن خوە یێن ل سەر کەشتیێن بازرگانی دەست پێ کرنە.
ل بەرانبەری وێ یەکێ ژی، هێزێن ئه‌مه‌ریكا و بریتانیایێ ل رۆژهلاتا ناڤین و دەریایا سۆر ژ 12ێ چلەیا ئیسال ڤە بنگەهـ و پشتەڤانیێن لۆژستییێن چەکدارێن حووسی دکن ئارمانج.
