مالپەرا ئال-مۆنیتۆر رادگەهینە، واشنگتۆن ب پێشوازیکرنا سەرۆکێ حکوومەتا هەرێما کوردستانێ مەسروور بارزانی ڤە پەیامێ ددەته ئیرانێ و دەستهلاتدارێن عەرەبێن شیعە یێن ئیراقێ کو ژ بۆ خاترا ئیرانێ دەست ژ ئیراقێ بەرنەدن.
ئال-مۆنیتۆر د راپۆرتەکێ دا ب سەرناڤێ «ئیدارەیا بایدن پشتەڤانیا هەرێما کوردستانا بەرخوەدێر دکەت» رادگەهینیت: وەزیرێ دەرڤەیێ ئامەریکایێ ئانتۆنی بلنکەن د دەما جڤینا رۆژا دوشەمبێ یا ل گەل سەرۆکوەزیرێ هەرێما کوردستانێ مەسروور بارزانی دا راگەهاند، ئامەریکا پشتەڤانیا هەرێما کوردستانەکا نەرم دکەت و هەرێمێ وەک کەڤرێ گۆشەیی د پەیوەندیێن داینامیکی یێن بەرفرەهـ ل گەل ئیراقێ دبینیت.
ل گۆری هەمان راپۆرتێ: کەڤرێ گۆشەیی و بەرخوەدێر ئەو پێناسەیێن دیپلۆماتیک نینن کو ئەم فێربووینە، ئەڤ یەک دهێته وێ واتەیێ کو ب رێیا ڤێ پێناسەیێ ڤە ئاماژەیەکی دهنێرن و پەیامەکێ دده‌ن و دخوازن ببێژن کو واشنگتۆن پشتەڤانیا حکوومەتا هەرێما کوردستانێ دکەت، هەروه‌ها ژ بۆ خاترا ئیرانێ ژی ل گەل ئیراقێ د ڤێ مژارێ دا رێکنابە.
هەروه‌ها ئاماژە ب وێ یەکێ دهێته دان کو رەوش گەهەشتیە ئاستەکی کو ئامەریکا ب ئاوایەکی قۆناغ ب قۆناغ، ئیراقێ ژ دەست بدەت و هەگەمۆنیا ئیرانێ ل سەر هەموو ئیراقێ فەرز ببیت، ب تایبەت ژی پشتی کو چارچۆڤەیا هەماهەنگیێ کو هەڤپەیمانیا شیعه‌یێن ئیراقێ یە و حکوومەتا نوو یا ئیراقێ پێكدئینیت، ب تایبەت ڤێ داویێ ژی داخواز کرینە کو هێزێن ئامەریکایێ خوە ژ ئیراقێ ڤەکێشن.
ئال-مۆنیتۆر رادگەهینیت کو ئیرانێ پلانەک دانایە ژ بۆ داویئانینا هەرێما کوردستانێ و نه‌هێلانا سیستەما فیدرالی و دیار كر، «دادگەها فەدەرال» یەک ژ ئاموورێن ب باندۆر یێن ئیرانێ یە ژ بۆ جیهبجیهکرنا ستراتەژیا ئیرانێ. ب ڤێ دیتنێ دادگەهـێ بریار ل دژی دۆسیایا پەترۆلا هەرێما کوردستانێ و مووچەیێن فەرمانبەرێن هەرێما کوردستانێ دایە.
