جیگرا سەرۆکێ ئامەریکایێ راگھاند، وان فشار ل ئیسرایلێ کریە کو رێ بدە ئالیکاریێن مرۆڤی یێن زێدەتر دەرباسی غەززەیێ ببن و شەرێ وێرانکەر راوەستینە.
جیگرا سەرۆکێ ئامەریکایێ کامالا ھاڕیس ل باژارێ سەلمایێ ل ویلایەتا ئالابامایێ راگھاند، تشتێ کو ئەو ھەر رۆژ ل غەززەیێ دبینن وێرانکەرییە و دڤێت شەر دەملدەست راوەستە.
جیگرا سەرۆکێ ئامەریکا گۆت ژی، وان فشار ل ئیسرایلێ کریە کو رێ بدە ئالیکاریێن مرۆڤی زێدەتر بگھن کارتا غەززەیێ، ئەگەر نەبە رەوش دێ خەرابتر ببە.
ھاڕیس گۆت: “ھەژمارەکا مەزن ژ فلستینیێن بێگونەھ ل غەززەیێ ھاتنە کوشتن، ئەڤ یەک تەڤلھەڤییە و نایێ قەبوولکرن”. ھەر وھا بانگ ل ئیسرایل کر کو دڤێت کار ژ بۆ ڤەگەراندنا پەرگالا رێڤەبەریێ یا ل غەززەیێ د زووترین دەم دە بکە.
ژ 7 جۆتمەھێ و ڤر ڤە ھەژمارا کوشتیێن شەرێ ل غەززەیێ گھیشتیە 30 ھەزار و 410 کەسان. رایەدارێن تەندورستیێ یێن غەززەیێ دیار کرن کو ھەژمارا برینداران ژی گھیشتیە 71 ھەزار و 700 کەسان.
نێزیکی 5 مەھانە شەرێ ئیسرایل و حەماسێ بەردەوامە و تێ چاڤەرێکرن کو رێڤەبەریا سەرۆکێ ئامەریکایێ جۆ بایدن بەریا مەھا رەمەزانێ ئاگربەستێ راگھینە.
