پارتیێن شیعە یێن ئیراقێ دخوازن ب رێیا پارلەمەنتۆیا ئیراقێ بریارەکا «مەجلس قیادەت سەورە» د بەرژەوەندیا دادوەران دە هلوەشینە.
ل گۆر ئاگاهیان، د جڤینا پارلەمەنتۆیا ئیراقێ یا د 24/2/2024ان دە، خوەندنا یەکێ ژ بۆی پرۆژە یاسایا هلوەشاندنا بریارا ژمارە 15 یا سالا 2003 یا «مەجلس قیادەت سەورە»، کو تێ دە باس ل وان باج و رسووماتان تێ کرن یێن ل دادگەهان و وەزارەتا داد ژ خەلکێ تێن وەرگرتن و ل داویا مەهێ دە ژ سەدی 70 ب کارمەند و دادوەران تێ دایین، هاتیە کرن.
چاڤکانی ددن خویانکرن، ئارمانجا پارتیێن شیعە ب تایبەتی چارچۆڤەیا هەماهەنگیێ ژ ڤێ یەکێ ئەوە کو دەرمالەیێن دادوەر و کارمەندێن دادگەهان زێدە بکن، هەر وەها دەستهلاتێن وان ژی زیدەتر بکن، ب ڤێ یەکێ ژی چارچۆڤەیا هەماهەنگیێ دخوازە دادوەران خەلات بکە، ژ بەر کو بریاران د بەرژەوەندیا شیعەیان دە ددن.
