وەزیرێ بەرگریێ یێ ترکیەیێ رادگەهینە کو، هاڤینا ئیسال ئارێشەیا په‌كه‌كێ ل سنۆرێن ئیراقێ و هەرێما کوردستانێ چارە دکن، ئەڤ ژی پشتی بۆرینا هەفتیەکێ ب سەر راگەهاندنا ئەردۆگانی رە تێ کو ئاماژە دابوو دەستپێکرنا ئۆپەراسیۆنەکە سەربازی یا نوو ل دژی په‌كه‌كێ.
وەزیرێ بەرگریێ یێ ترکیەیێ یه‌شار گولەر ژ رۆژنامەیا حوریەت را ئاماژە كره ئۆپەراسیۆنا چاڤەرێکری یا ئارتێشا ترکیەیێ ل سەر سنۆرێن ئیراق و هەرێما کوردستانێ و راگەهاند کو، ئه‌وێ هاڤینا ئیسال ئارێشەیا په‌كه‌كێ ل سنۆرێن ئیراق و هەرێما کوردستانێ چارە بکن.
گولەر هەروەسا گۆت کو ئه‌و دخوازن کۆریدۆرەکا ئەولەهیێ ب کووراتیا 30 هەتا 40 کیلۆمەتران چێ بکن ژ پێخەمەتی پاراستنا سنۆرێن خوە. ئاماژە دا وێ یەکێ ژی کو، بەرپرسێن بلندێن ئیراقێ تەکەزێ ل سەر وێ یەکێ دکن کو په‌كه‌كه ژ بۆ وان ژی بوویە سەدەما ئارێشەیان و ل هەرێما کوردستانێ ژی ب سەدان گوند هاتنە بەردان.
سەرۆککۆمارێ ترکیەیێ رەجەب تەییب ئەردۆگان سێشەما بۆری، 5ێ ئادارا 2024ێ، پشتی جڤینا کابینەیا حکوومەتێ راگەهاند کو، ل پاشەرۆژەکە نێزیک ب رێیا ئۆپەراسیۆنەکێ بازنا ئەولەهیێ ل ئیراقێ تەمام دکن.
ئەڤ گۆتن د مەدیایێن جیهانی دە وەکی ئامادەکاری ژ بۆ برێڤەبرنا ئۆپەراسیۆنەکە دن ل دژی په‌كه‌كێ هات شرۆڤەکرن.
هەروەسا هلبژارتنێن شارەداریان ژی نێزیک بوونە و ئۆپۆزسیۆن دەستهلاتێ ب وێ یەکێ تۆمەتبار دکە کو، ل گەل نێزیکبوونا هەر هلبژارتنەکێ دەستهلات بەحسا ئۆپەراسیۆنێن سەربازی دکە.
ئەڤ ژی د دەمەکێ دەیە کو، وەزیرێ دەرڤەیێ ترکیەیێ هاکان فیدان و سەرۆکێ دەزگەها هەوالگری یا ترکیەیێ ئیبراهیم کالن د چەند رۆژێن بۆری دە ل ئامەریکایێ بوون و ئاژانسێن نووچەیان ئاماژە دا کو ترکیە بزاڤێ دکە ئامەریکایێ رازی بکە کو چ رێگری و رەنگڤەدان ل بەرنابەری وێ ئۆپەراسیۆنێ نەبن.
هەروەسا بەهسا وێ یەکێ ژی تێ کرن کو، ترکیەیێ نیەتە ئەو ئۆپەراسیۆن تەنێ ل سنۆرێ هەرێما کوردستانێ و ئیراقێ بە و ئامەریکایێ تەنێ تێبینی ل سەر رۆژئاڤایێ کوردستانێ هەیە.
ئارتێشا ترکیەیێ ژ 27ێ گولانا 2019ێ هەتا نها هەژمارەکە ئۆپەراسیۆنێن بەژاهی و ئاسمانی ل سنۆرێ هەرێما کوردستانێ کرنە، کو یا هەری داویێ ئۆپەراسیۆنا په‌نجه كلید بوو.
