ھەلبەستڤان و بەرپرسێ وەشانگەھا “نەشر باشوور” یا ئیلامێ محەمەد مورادی نەساری کو ل دبستانەکا باژارێ سنە یا ل رۆژھلاتێ کوردستانێ مامۆستا بوو، ژ کار ھات دوورخستن.
ل گۆر زانیاریێن بەردەست د چەند رۆژێن بۆری دە، چالاکڤانێ چاندی و رێڤەبەرێ دبستانێن باژارێ سنە محەمەد مورادی نەساری ژ بەر سەدەمەکی نەدیار و ب بریارەکی نەیاسایی یا ناڤەندێن ھێزێن ئەولەھیا ئیرانێ، ژ بەرپرسیارتیا خوە ھاتیە دوورخستن و ئەو ژ کار دەرخستیە.
وی ھەلبەستڤانی د تۆرا خوە یا جڤاکی دە راگەھاند، بەشا وەرگرتنێ یا رێڤەبەریا پەروەردەیا سنە بانگی وی کرنە و ھندەک پرس ژێ کرنە، ژ ئالیێ ناڤەندێن ئەولەھیێ ڤە ئەو پرس ھاتنە دیار کرن و ژ وی ھاتنە پرسکرن.
ھەروەھا راگەھاندیە: “وان پرسان پەیوەندیا خوە ب چالاکیێن چاندی و وێژەیی ڤە ھەبوونە و وەک بەشداری کرن ل فەستیڤالا ‘گەلاوێژ’ و رێڤەبەرنا مەراسیما خەلاتا وێژەیی یا باشوور.”
ل گۆر نڤیسا وی چالاکڤانێ چاندی، دەما کو زانیە ژ کار ھاتیە دوورخستن، دووڤچوون ل سەر وەرنەگرتنا مووچەیێ مەھانە کریە.
ھێژایی گۆتنێیە، محەمەد مورادی نەساری یەک ژ چالاکڤانێ ناسیار یێن چاندی و وێژەیی یێ کوردە، ل ئەیوان و ئیلام و کوردستانێ. بەری نھا ژی گەلەک جاران ژ ئالیێ ھێزێن رێڤەبەریا ئیتیلاعات (ئیستخباراتا ئیرانێ) و ئیتلاعاتا سپاھا پاسداران ڤە ھاتیە گازی کرن و لێپرسین ل گەل ھاتیە کرن. ھەروەھا ل سەر چالاکیێن وی لێکۆلین ھاتنە کرن و گەف لێ ھاتنە خوارن.
