وەزارەتا بەرەڤانیێ یا ئامەریکایێ (پەنتاگۆنێ) راگهاند وان ئەم داخواز ژ کۆنگرەسسێ كر کو بودجەیا سیستەما بەرەڤانیا ئاسمانی ژ هەرێما کوردستانێ رە وه‌ره پەسەند كرن.
بەردەڤکێ پێنتاگۆنێ پات ریدەر د کۆنفەرانسەکە رۆژنامەڤانی دە بەرسڤا پرسا پەیامێرێ ک24ێ دا و راگهاند، «ئەم ل بەندێنە کو بوودجەیا سالا 2024ان وەرە قەبوولکرن».
بەردەڤکێ پێنتاگۆنێ گۆت: «ئەم داخوازێ ژ کۆنگرەیسێ دکن کو بودجەیێ پەسەند بکە و دەما کو ئەو هات پەسەندکرن، ئەمێ هوورگلیێن زێدەتر گۆتووبێژ بکن».
پێشتر گەنەرالێ بەرێ یێ ئارتێشا ئامەریکایێ ئەرنەست ئۆدەرنۆ گۆتبوو، دڤێ واشنگتۆن ئەولەهیا هەرێما کوردستانێ دابین بکە، ژ بەر وێ ژی ئەو ژ سەدی سەد ب شاندنا سیستەمێن بەرەڤانیا ئاسمانی ژ هەرێما کوردستانێ رە یە.
گەنەرال ئەرنەست ئۆدەرنۆ گۆت، هەرێما کوردستانێ هەڤپارەکە مەزنا ئامەریکایێ یە و نها پێویستیا وان ب سیستەما بەرەڤانیا ئاسمانی هەیە، ژ بەر کو ئەو د بن گەفا ئیران و هەڤپەیمانێن وێ دە یە.
د دەربارێ شاندنا سیستەمێن بەرەڤانیا ئاسمانی ژ ئامەریکایێ بۆ هەرێما کوردستانێ دە، گەنەرال ئەرنەست ئۆدەرنۆ گۆت کو پێنتاگۆن دکارە ب دو ئاوایان سیستەمێن بەرەڤانیا ئاسمانی ل هەرێما کوردستانێ بجیهـ بکە، رێیا یەکەم پەروەردەکرنا هێزێن پێشمەرگەیە ژ بۆ بکارئانینا سیستەمێ و رێیا دویەم ژی ئەوە کو ئامەریکا ب خوە چاڤدێریا بکارئانینا سیستەمێ ل ناڤچەیێ بکە.
کۆمیتەیا ئاساییش و بەرەڤانیێ یا کۆنگرەسا ئامەریکایێ بەندەک ژ بۆ سەرەراستکرنا یاسایا وەزارەتا بەرەڤانیێ یا سالا 2024ێ زێدە کریە و تێ دە داخواز کر کو سیستەما بەرەڤانیا ئاسمانی ژ هێزێن پێشمەرگە رە وەرە دایین.
