ناڤەندا مافێن مرۆڤان ل زانینگەھا بەرکەلەی ل کالیفۆرنیایێ راپۆرتا خوە یا داوی دەربارێ رەوشا مافێن مرۆڤان ل ئیرانێ بەلاڤ کر و دیار کر، د چارچۆڤەیا تەپەسەرکرنا خوەپێشاندانێن سالا 2022 دە ژ ئالیێ رەژیما ئیرانێ ڤە، زێدەتری 120 خوەپێشاندەران چاڤێن خوە ژ دەست دانە یان ژی چاڤەکی وان ھاتیە کۆرە کرن.
ل گۆری لێکۆلینێن زانینگەھێ، ئەو جوان ژ ئالیێ ھێزێن ئیرانێ ڤە ب تفەک و گازا رۆندکرێژ ھاتنە کۆرەکرن. پرانیا وان خوەندەکارێن بن 30 سالیێ بوون، د ناڤ وان دە کەچەکا پێنج سالی کو ژ ئالیێ ھێزێن ئەولەکاریا ئیرانێ ڤە ھاتیە کۆرەکرن کو ژ بالکۆنا خوە ل خوەپێشاندانان تەماشە دکر.
ھەروھا کۆمسیۆنا لێکۆلینێ یا ل سەر بنپێکرنا مافێن مرۆڤان یا ئەنجوومەنا ئاسایشا ناڤدەولەتی ھەفتەیا بۆری ل جنێفێ کۆمارا ئیسلامی یا ئیرانێ ب تاوانێن ل دژی مرۆڤاھیێ تاوانبار کر و راگھاند، وێ د دەما خوەپێشاندانان دە ب پێکانینا تاوانێن ل دژی مرۆڤاھیێ، مافێن مرۆڤان بنپێ کریە.
رۆژا 13 ئیلۆنا 2022، کەچا کوردا ژ سەقزێ ژینا ئەمینی لگەل مالباتا خوە سەردانا تەھرانێ کربوو. ژینا وێ رۆژێ ژ ئالیێ پۆلیسێ ئەولەھیا جڤاکی یا تەھرانێ ڤە ب تۆمەتا “گوھنەدانا حیجابێ” ھاتبوو گرتن. پشتی کو ل رێڤەبەریا پۆلیسان رەوشا وی خراب بووبوو، راکرن نەخوەشخانەیێ. ژینا پشتی 3 رۆژان ل نەخوەشخانەیێ کۆچا داوی کر و رۆژا 17 ئیلۆنێ ل گۆرستانا سەقزێ ھات ڤەشارتن.
پشتی کۆچا داوی یا ژینا ئەمینی، ل ڤی وەلاتی خوەپێشاندان دەرکەتن و ب سەدان کەس ھاتن کوشتن و بریندارکرن و ب ھەزاران کەس ھاتن گرتن.
رێخستنێن مافێن مرۆڤان گۆتن کو زێدەتری 500 کەس د دەما خوەپێشاندانان دە ھاتن کوشتن، کو 71 ژ وان بچووک بوون، ب سەدان بریندار بوون و ب ھەزاران کەس ژی ھاتن گرتن.
