د ئێریشەکە ئاسمانی دە، سەرێ سبەها ئیرۆ بنگەهێن ملیشیایێن نێزی ئیرانێ ل سنۆرێ پارێزگەها دێرازۆرێ یا سووریێ هاتن ئارمانجکرن. ل دوو زانیاران، سەرکردەیەکی سپایێ پاسدارێن ئیرانێ یێ ب ناڤێ «حاجی عەسکەر» د ناڤ کوشتیان دە یە.
د ئێریشەکە ئاسمانی دە، سەرێ سبەها ئیرۆ سێشەمێ، 26\03\2024 بنگەهێن ملیشیایێن نێزی ئیرانێ ل سنۆرێ پارێزگەها دێرازۆرێ یا سووریێ هاتن بۆمبه‌بارانكرمن ل دوو زانیاران، سەرکردەیەکی سپایێ پاسدارێن ئیرانێ یێ ب ناڤێ «حاجی عەسکەر» د ناڤ کوشتیان دە یە.
رەوانگەها سووریەیی یا مافێن مرۆڤان بەلاڤ کریە، «ئەشکەرە نەبوویە کا ئەو ئێریش ژ ئالیێ بالافرێن شەری یێن ئامەریکایێ یان ژی ژ ئالیێ هێزێن ئاسمانی یێن ئسرائیلێ ڤە هاتیە کرن، لێ چەند سەئەتان پشتی دادانا بالافرەکە ئیرانی ل بالافرخانەیا دێرازۆرێ، بنگەهێن ملیشیایان ل زەڤیێن مەیادین و بۆکەمال و دەڤەرا عەباسێ و بنگەهەک ژی ل تاخا فەیلاتیێ یا باژارێ دێرازۆرێ هاتنە ئارمانجکرن.
رەوانگەهێ ئاماژە ژی دایە، «ل دوو ئامارێن دەستپێکی، ل وێ بنگەها چەکداران کو ل تاخا فەیلاتیێ یا باژارێ دێرازۆرێ یە، ژ بلی حاجی عەسکەرێ سەرکردەیێ سپایێ پاسدارێن ئیرانێ، 7 چەکدارێن دن ژی یێن ئیرانی هاتنە کوشتن.
هەر ل دوو زانیارێن رەوانگەها سووریەیی یا مافێن مرۆڤان، ئەو بالافرا ئیرانی یا کو ل بالافرخانەیا سەربازی یا دێرازۆرێ دادابوو چەند سەعەتان پێشتر ل بالافرخانەیا ناڤدەولەتی یا دیمەشقێ ب بارەکی لۆژستی ڤە فریبوو و چەند ئەندامێن سپایێ پاسداران ژی تێ دە بوون.
ژ ئالیەکی دن ڤە چەند چاڤکانیێن دن یێن نووچەیێن ناڤخوەیی یێن سووریێ بەلاڤ کریە کو، وێ ئێریشا ئاسمانی جڤینەکە کۆمێن ملیشیایێن ئیرانێ ل باژارێ بۆکەمالێ یێ رۆژهلاتێ دێرازۆرێ کریە ئارمانج.
هەروەسا سپایێ پاسدارێن ئیرانێ ژی ل سەر تۆرا جڤاکی یا تەلەگرامێ بەلاڤ کریە کو، بالافرێن شەری یێن ئامەریکایێ باژارێن بۆکەمالێ و مەیادینێ و دەڤەرا قسووریانێ ل سنۆرێ پارێزگەها دێرازۆرێ بۆمبەباران کرنە، و ل دوو ئامارێن دەستپێکی، زێدەتری 20 کەسان بریندار بوونە کو ژن و زارۆک ژی د ناڤ وان دە هەنە.
