حەشدا شەعبی دبە بەشەک ژ لھەڤکرنەکا گرنگ یا بەغدا و ئەنقەرەیێ و ل گۆر گۆتنا چەند چاڤکانیێن ئیراقی و ترکییی، دوور نینە د چارچۆڤەیا پلانێن رێکخستنا ئەولەھیا دەڤەرێ دە، پشتی شەرێ غەززەیێ، پێگەھا پەکەکێ ل شنگالێ بکەڤە د مەترسیێ دە و ئۆپەراسیۆنێن سەربازی یێن ترکییێ ب کریار ل وێ دەڤەرێ زێدە ببن.
رۆژنامەیا شەرقولەوسەتێ راپۆرتەک بەلاڤ کریە و بێ دیارکرنا ناڤی ژ ئالیێ بەرپرسەکی ترکییێ ڤە بەلاڤ کریە، د چارچۆڤەیا ئامادەکاریان دە ژ بۆ گوھەرتنان د ئەولەھیا دەڤەرێ دە پشتی شەرێ غەززەیێ، شاندا حکوومەتا ترکییێ لگەل حکوومەتا ئیراقێ لھەڤکرنەک کریە کو شنگال ژی تێ دەیە.
وەزیرێ دەرڤەیێ ترکییێ ھاکان فیدان ژ بۆ ڤێ مەرەمێ د چاڤپێکەفتنەکێ دە لگەل کانالا CNN یا ترکییێ، ب ئاماژەدان ب سەرۆکێ دەستەیا حەشدا شەعبی یا ئیراقێ فالح فەیاز ئەشکەرە کریە، د دەرھەقا شنگالێ دە لگەل دەزگەھەکا فەرمی یا ئیراقێ هەڤتێگەهشتن ھەیە. مانایا ڤێ ژی ئەوە کو ترکیا ڤێ جارێ ب گرانیەکا زێدەتر یا سیاسی و سەربازی نێزیکی ئیراقێ بوویە، ژ بۆ بداویانینا نەسەقامگیری و گەفێن کو ل سەر سنۆرێن باشووری ھەنە.
ئەڤ ژی د دەمەکێ دەیە کو شاندەکا بلند یا ترکییێ ب سەرۆکاتیا وەزیرێ دەرڤەیێ ترکییێ ھاکان فیدان و ئەندامەتیا وەزیرێ بەرگریێ یێ ترکییێ یاشار گولەر، بەرپرسێ دەزگەھا نەتەوەیی یا ھەوالگریا ترکییێ ئیبراھیم کالن و جیگرێ وەزیرێ ناڤخوەیێ ترکیەیێ مونیر کارالۆگلۆ سەردانا بەغدایێ کر و لگەل وەزیرێ دەرڤەیێ ئیراقێ فوئاد حسێن و سەرۆکێ دەستەیا حەشدا شەعبی یا ئیراقێ فالح فەیاز و شێورمەندێ ئەولەھیا نەتەوەیی قاسم ئەعرەجی جڤیا.
پشتی وێ جڤینێ ژی، حکوومەتا ئیراقێ د بەیاننامەیەکێ دە راگەھاند، ھەبوونا چەکدارێن پەکەکێ ل سەر ئاخا ئیراقێ بنپێکرنا دەستوور و سەروەریا ئاخا ئیراقێ یە.
ھەروەسا حکوومەتا ترکییێ ژی پشتی وێ سەردانێ دلخوەشیا خوە دیار کریە کو، لگەل ئالیێ ئیراقی دانووستاندن کرنە و ل سەر وێ یەکێ ل ھەڤ کریە کو، ھێزێن ترکییێ ب کووراتیا 40 کیلۆمەتران و ب درێژاھیا سنۆران ھەر ژ سلێمانیێ ھەتا شنگالێ و ھەتا سنۆرێ سووریەیێ دکارن ئۆپەراسیۆنێن سەربازی ژ بۆ نەھێلانا گەف و مەترسیێن ئەولەھیێ بکن.
