د ئێریشەکا ئاسمانی دە ل سەر بارەگەھێن پاسدارێن ئیرانێ ل دێرازۆرێ دە، نێزیکی 50 ئەندامێن پاسدارێن ئیرانێ و چەکدارێن سەر ب وێ ڤە ھاتن کوشتن و بریندارکرن.
رەوانگەھا سووری یا مافێن مرۆڤان بەلاڤ کر، بارەگەهێن پاسدارێن ئیرانێ ل دێرازۆر و بۆکەمالێ ژ ئالیێ فرۆکەیێن نەناس ڤە ھاتن بۆمبەبارانکرن و د ئەنجامێ دە 15 کەس ھاتن کوشتن کو د ناڤا وان ئەفسەرەکی پاسدارێن ئیرانێ یێ ب پلەیا عەقید، 2 پاسەوانێن وی و 9 کەسێن ب رەگەز ئیراقی ھەنە.
ل گۆری زانیاریێن رەوانگەھێ، د ئێریشان دا زێدەتر ژ 35 کەسێن دن بریندار بوون کو د ناڤا وان دە کەسێن ژ رەگەزێن ئیرانی و ئیراقی ژی ھەبوون.
رەوانگەھێ دیار کر کو “ئێریشێن ئاسمانی چەند دەمژمێران پشتی گھەشتنا فرۆکەیەکا بارھەلگرا ئیرانی ژ شامێ بۆ فرۆکەخانەیا لەشکەری یا دێرەزۆرێ پێک ھاتن”. دا زانین ژی، “ماددەیێن لۆجیستیکی و تەکنیکی یێن پێشکەتی و ئەندام و کەسایەتیێن ژ پاسدارێن ئیرانێ” ژی د وێ فرۆکەیێ دە بوون.
ژ ئالیێ خوە ڤە، بالیۆزخانەیا ئیرانێ ل شامێ دیار کر، عەقید بەھرۆز واحدی د ئێریشا ل سەر بارەگەھێن ل رۆژھلاتێ سووریەیێ دە ھاتیە کوشتن.
ھەتا نھا نەھاتیە زانین کا کیژان ئالی ئەڤ ئێریش پێک ئانیە. د دەمەکێ دە کو داوی ئێریشا ئاسمانی یا ئامەریکا راگھاندی ل سەر بارەگەھێن میلیشیایێن سەر ب ئیرانێ ڤە، د 2 و 3 شباتا بۆری دە بوو کو 28 جھێن ل دێرەزۆر، مەیادین و بۆکەمالێ کرن ئارمانج و د ئەنجامێ دە 34 ئەندامێن میلیشیایێن ئیرانی ھاتن کوشتن.
