ل گۆری رێخستنا کۆچێ یا ناڤدەولەتی د 10 سالێن داوی دە، زێدەتری 63 هەزار کەسی جانێ خوە ژدەست دان.
رێخستنا کۆچێ یا ناڤدەولەتی د راپۆرتەکێ دە دیار کر، د ناڤبەرا سالێن 2014 و 2023ان دە ل سەرانسەرێ جیهانێ زێدەتری 63 هەزار کەسی د رێیێن کۆچبەریێ دە مرنە یان وندا بوونە. ژ ڤێ هەژمارێ، زێدەتری 28 هەزار کۆچبەر د دەریایا سپی دە جانێ خوە ژدەست دانە.
هه‌ر وها گۆت کو ژ سەدی 60ێ مرنێن کو هاتنە راگهاندن، ژ بەر خەندقینێ نە.
د راپۆرێ ده هاتیه: سالا 2023ان، سالا هەری کوژەرا کۆچبەران بوو کو تەنێ وێ سالێ 8500 کەس مرن، ژ وان 3700 کەس ژ بەر خەندقینێ بوون.
رێخستنێ دا زانین، یەک ژ سێ تەرمێن کو هاتنە تۆمارکرن ژ وەلاتێن کو پەڤچوونێن چەکداری یان شەرت و مەرجێن ژیانێ یێن دژوار لێ هەنە، وەک: ئافگانستان، بورما، سووریە و ئەتیۆپیا.
ب نێزیکبوونا هلبژارتنێن پارلامەنتۆیا ئەورۆپایێ رە کو بریارە د ناڤبەرا 6 – 9ێ هەزیرانێ دە بێ کرن، ئەنجامێن راپرسیەکێ کو ژ ئالیێ ناڤەندا ئپسۆس ڤە هاتیە کرن، دیار دکە کو نیڤێ ئەورۆپیان قانوونێن پەنابەران ناپەژرینن و داخوازا کۆنترۆلا سینۆران دکن.
ل گۆری راپرسیێ کو ل 18 وەلاتان د ناڤ 26 هەزار کەسان دە هاتیە کرن؛ %51 ژ ئەورۆپیان نێرینەک «نەرێنی» ل سەر سیاسەتا کۆچبەریێ یا یەکیتیا ئەورۆپی هەیە.
