حه‌یده‌ر عه‌بادی سه‌رۆكوه‌زیرێ به‌رێ یێ ئیراقێ راگهاند؛ په‌كه‌كه رێخستنه‌كه «ته‌رۆریستی» یه و ئیراق نابه به‌شه‌ك ژ شه‌رێ تركیێ یێ ل دژی ڤێ رێخستنێ.
حه‌یده‌ر عه‌بادی دوهـ رۆژا شه‌می 30/3/2024ێ ته‌ڤلی به‌رنامه‌یا ناڤه‌ندا «ئه‌لـ رافیده‌ین یا دیالۆگێ» بوو و هنه‌ك نرخاندن ده‌ربارێ ره‌وشا نها یا ئیراقێ، پێوه‌ندییا نێڤبه‌را حكوومه‌تا فه‌ده‌رال و حكوومه‌تا هه‌رێما كوردستانێ و هه‌ر وها پرسا په‌كه‌كێ و شه‌نگالێ كر.
عه‌بادی د به‌رسڤا پرسه‌كه ده‌ربارێ په‌كه‌كێ ده گۆت كو په‌كه‌كه د نه‌رینا ئه‌مه‌ریكایێ و گه‌له‌ك ده‌وله‌تان ده «رێخستنه‌كه ته‌رۆریستی» یه، پشتگرییا كو ئه‌مه‌ریكا دده هه‌سه‌دێ ژی ب وێ واتایێ تێ كو ئه‌و جوداهیێ ل نێڤبه‌را كوردێن سووریێ و تركیێ ده دكه.
ده‌ربارێ شه‌رێ تركیێ و په‌كه‌كێ و سه‌ردانێن رایه‌دارێن ترك بۆ به‌غدایێ و زه‌ختا تركیێ كو دخوازه به‌غدایێ ته‌ڤلی شه‌رێ ل دژی په‌كه‌كێ بكه، سه‌رۆكوه‌زیر به‌رێ یێ ئیراقێ عه‌بادی گۆت: «په‌كه‌كه دژمنێ یه‌كه‌م یێ تركیێ یه، لێ ئه‌م نابنه به‌شه‌ك ژ ڤی شه‌ری، د هه‌مان ده‌مێ ده دڤێ ئه‌م رێ نه‌دن خاكا ئیراقێ بۆ ئێریشا سه‌ر ده‌وله‌تێن جیران و تركیێ وه‌ره بكارئانین».
د به‌شه‌كا دن یا گۆتنێن خوه ده عه‌بادی گۆت: «شه‌رێ تركیێ و په‌كه‌كێ پرسكه ناڤخوه یا تركیێ یه و دووركه‌تنا ئیراقێ ژ ڤی شه‌ری پره‌نسبه‌كه جیهگیره و ئه‌م ژ بۆی ت به‌رژه‌وه‌ندییا ده‌ست ژ ڤێ پره‌نسپا خوه به‌رنادن».
ده‌ربارێ هێزێن په‌كه‌كێ یێن ل شه‌نگالێ ژی كو ب ئاوایه‌كی فه‌رمی د چارچووڤه‌یا حه‌شدا شه‌عبی ده جیهـ دگرن و مووچه‌یان ژ ده‌وله‌تا ئیراقێ دستینن، عه‌بادی گۆت: «ئه‌ڤ یێك ب ت ئاوایی وه‌كه كاره‌كی راست نایێ دیتن».
چه‌ند رۆژان به‌رێ وه‌زیرێن ده‌رڤه و به‌رگریێ یێن تركیێ سه‌ردانا به‌غدایێ كرن ژ بۆی ئیمزه‌كرنا په‌یمانه‌كێ كو ئیراق ب ئاوایه‌كی فه‌رمی ته‌ڤلی شه‌رێ ل دژی په‌كه‌كێ ببه، ته‌ڤی كو ناڤه‌رۆكا ڤێ په‌یمانێ هێژان ب دروستی زه‌لال نه‌بوویه، لێ به‌لێ سه‌رۆككۆمارێ تركیێ تاییپ ئاردۆگان راگهاندیه كو ئه‌و ل هاڤینا ئیسال 2024ێ ئۆپه‌راسیۆنه‌كه به‌ژاهی یا به‌رفه‌ره‌هـ ل دژی په‌كه‌كێ ل هه‌رێما كوردستانێ ئه‌نجام بدن و گۆت: ئه‌م ژ پاقژكرنا سینۆرێن خوه یێن ب ئیراقێ ره ژ ته‌رۆریستێن په‌كه‌كێ نێزیك بوونه.
ئه‌ڤ گۆتنا ئاردۆگان وه‌كه ئاماژه‌یه‌كێ تێ كو ئیراق وێ ب ره‌نگه‌كی ببه ئالیكارا تركیێ بۆ ڤێ ئۆپه‌راسیۆنا چاڤه‌رێكری یا ل دژی په‌كه‌كێ.
