پشتی ئێریشا ئسرائیلێ یا ل سەر کۆنسولخانەیا ئیرانێ ل دیمەشقێ و کوشتنا هەژمارەکا ئەندامێن ئارتێشا پاسداران و ملیشیایان، بەرەیێ مقاومەیا ئیسلامی ل دژی ئه‌مه‌ریكا و ئسرائیلێ گەفێن دەستپێکرنا چالاکیان دکە.
ژ بۆ هەیاما دو مەهان ئاگربەستا رانەگەهاندی د ناڤبەرا ملیشیایێن نێزی ئیرانێ ل ئیراق و سووریێ ب ئه‌مه‌ریكایێ رە هەبوو، لێ پشتی وەشاندنا گورزێ سەربازی ژ ئالیێ ئسرائیلێ ڤە و کوشتنا هەشت ئەندامێن ئارتێشا پاسداران و ملیشیایێن گرێدایی ئیرانێ ل دیمەشقێ کو دو ژ وان بەرپرسێن بلند بوون، دبە کو خالا داویێ یا وێ بێدەنگیێ بە و جارەکا دی رەوشا ئیراق و سووریێ تێک بچە.
ئەبو ئالائێ وەلائی، کو ئەمیندارێ کەتیبەیێن سەییدولشوهەدایێ یە و یەک ژ سیمایێن دیارێن بەرەیێ مقاومەیا ئیسلامی یە، ب بەلاڤکرنا ئایەتەکا قورئانێ گەفێن تۆلڤەکرنا کوشتنا دو بەرپرسێن بلندێن ئارتێشا پاسداران دکە.
ژ گەفێن ئەبو ئالائێ وەلائی تێ پێشبینیکرن کو ببن چریسکا ئاگرێ ئێریشێن کۆمێن چەکدار بۆ سەر بنگەهێن ئه‌مه‌ریكایێ ل ئیراق و سووریێ ژ بەر کو وان کۆمان نێزیکیا خوە ژ بۆ ئیرانێ ڤەنەشارتیە.
ئاماژە بەر ب وێ یەکێ ڤە دچن کو چەند سیناریۆ ل بەر دەستێ ئیرانێ هەنە ژ بۆ بەرسڤدانا وێ ئێریشا ل سەر کۆنسولخانەیا وێ ل دیمەشقێ هاتیە کرن و کوشتنا بەرپرسێن ئارتێشا پاسداران، یا هەری گرنگ ژی دەستپێکرنا ئێریشێن ملیشیایان بۆ سەر بنگەهێن ئه‌مه‌ریكایێ ل ئیراق و سووریێ یە. هەتا تێ پێشبینیکرن ژی کو ڤێ جارێ کۆمێن چەکدار ئێریشێن خوە ژ بۆ سەر ئاخا ئسرائیلێ ژی زێدە بکن.
سیناریۆیەکا دی یا بەرسڤدانا ئیرانێ ژ بۆ گەفێن ئسرائیلێ پالدانا حزبولاها لبنانی یە کو زێدەتر ب ئسرائیلێ رە بچە ناڤ کووراهیا شەری و بەرفرەهکرنا ئێریشێن وێ یە ژ ئالیێ باکوری ڤە بۆ سەر تەلەڤیڤێ.
پێشبینیەکا لاواز ژی هەیە کو ئیران راستەراست ئێریش بکە سەر ئسرائیلێ، لێ کێمتر رێ دچە وێ ژ بەر کو د چەند دەهسالێن بۆری دە ئیرانێ دەست و تلێن خوە ب بکارئانینا کۆمێن چەکدارێن ملیشیایان ژ بۆ بەرگریکرنا ژ بەرژەوەندیێن خوە و بکارئانینا وان ژ بۆ بەرسڤدانا نەیارێن خوە نەرم کرنە، لەوما ژی تێ چاڤەرێکرن کو جارەکا دی ئیران کارتا کۆمێن چەکدار ب کار بینە، مەیدانا بکارئانینا وێ کارتێ ژی دێ ئیراق، سووریە، یەمەن و لبنان بن.
