سەرۆککۆمارێ ئیرانێ د دەرهەقا ئێریشا ئسرائیلێ یا ل سەر دیمەشقێ دە رادگەهینە، «دڤێ ئسرائیلی بزانن کو ب ڤان کریارێن نەمرۆڤانە قەت ناگەهن ئارمانجێن خوە، رۆژ ب رۆژ ژی بەرەیێ مقاومەیێ بهێزتر دبە و ئەو تاوان ژی بێ بەرسڤ نامینە».
سەرۆککۆمارێ ئیرانێ ئیبراهیم رەئیسی د بەیاننامەیەکێ دە ئێریشا ئسرائیلێ یا ل سەر دیمەشقێ و کوشتنا هەژمارەکا شێورمەندێن سەربازی یێن وەلاتێ خوە شەرمەزار کرن و راگەهاند، «ئێریشا ئسرائیلێ یا ل سەر ئاڤاهیێ کۆنسولخانەیا ئیرانێ ل دیمەشقێ کریارەکا نەمرۆڤانەیە و بنپێکرنەکا ئەشکەرە یا بریارنامەیێن ناڤدەولەتی یە».
سەرۆککۆمارێ ئیرانێ هەروەسا گۆت، «ئەو فەرماندەیێن ئارتێشا پاسداران یێن کو هاتنە ئارمانجکرن جەنگاوەرێن سەردەما بەرگرییا پیرۆز بوون و نها ژی ب ئەرکێ زێرەڤانیا جهێن بلند و پیرۆزێن ئیسلامێ و مۆرڤاتیێ ل سووریەیێ بوون».
ئیبراهیم رەئیسی د بەیاننامەیا خوە دە ئاماژە دایە، «رژێما دلبکینا ئسرائیلێ ژ بۆ خوەرزگارکرنا ژ شکەستن و بزاڤێن خوە یێن بێئەنجام ل بەرانبەری باوەرداران و مۆرالا موجاهدێن بەرەیێ مقاومەیێ، ب ئاوایەکێ چاڤکۆرانی دەست ب تەرۆرکرن و بریاردانێ کریە، لێ دڤێ بزانە کو ئەو کارێن وێ یێن نەمرۆڤانە قەت ناگەهن ئارمانجا خوە و رۆژ ب رۆژ دێ شاهدا بهێزبوونا بەرەیێ مقاومەیێ و نەفرەت و توورەبوونا نەتەوەیێن ئازادیخواز ل بەرانبەری پرۆژەیێن خوەیێن نەرەوا بە».
ناڤبری هەروەسا گەفا تۆلڤەکرنا قوربانیێن ئێریشا ئاسمانی یا دوهی (دوشەم، 1ێ نیسانا 2024ێ) کر و گۆت، «ئەو کریارا تاوانکاری و نەمەردانە یا ئسرائیلێ بێ بەرسڤ نامینە».
دوهی (دوشەم، 01ێ نیسانا 2024ێ) بالافرێن شەرییێن ئسرائیلێ ل دیمەشقا پایتەختا سووریەیێ ئاڤاهیەکێ نێزی بالیۆزخانەیا ئیرانێ کر ئارمانج.
پشتی چەند سەئەتان ژ وێ ئێریشێ، ئارتێشا پاسدارێن ئیرانێ ب ئاوایەکی فەرمی کوشتنا دو فەرماندە و پێنج شێورمەند و ئەفسەران د وێ ئێریشا ئسرائیلێ دە راگەهاند.
