حەشدا شەعبی خوە ئامادە دکە کو بەرسڤا ئیسرایلێ بدە و تۆلا کوشتنا 7 فەرماندارێن پاسدارێن ئیرانێ یێن کو ل شامێ ھاتنە کوشتن ھلینە و ژ بۆ ڤێ یەکێ ل بەندا فەرمانا رێبەرێ بلندێ ئیرانێ نە.
سەرۆکەرکانێ حەشدا شەعبی عەبدولعەزیز مەحمەداوی یێ ب ناڤێ “ئەبوو فەدەک” تێ ناسکرن ژ چەند مەدیایێن ئیرانێ رە راگھاند، ئەو تشتێن کو ل ئەنیێن یەمەن، ئیراق، لوبنان و فەلەستینێ ژ ئالیێ میحوەرێ مقاوەمێ و کۆمارا ئیسلامی یا ئیرانێ ڤە تێ کرن، ژ بۆ ژناڤبرنا ئیسرایلێ یە.
ئەبوو فەدەک گۆت، ئەو ل بەندا فەرمانا رێبەرێ بلندێ ئنقیلابا ئیرانێ نە کو بزانن دێ چ بکن ل ھەمبەر ئێریشا ئیسرایلێ یا ل سەر کۆنسولخانەیا ئیرانێ ل شامێ کو چەند فەرماندارێن پاسدارێن شۆرەشێ ھاتن کوشتن.
رۆژا 1 نیسانێ ھێزێن ئاسمانی یێن ئیسرایلێ ئێرشی سەر بالیۆزخانەیا ئیرانێ یا ل شامێ کربوو. مەدیایا فەرمی یا ئیرانێ ژی راگھاند، د ئێریشا ل دژی بالیۆزخانەیا ئیرانێ یا ل شامێ دە، 17 کەس ھاتبوون کوشتن کو 7 ژ وان فەرماندارێن ئیرانی بوون.
ئامەریکا بێ ئاگاهیا خوە ل ھەمبەر وێ ئێریشا ئیسرایلێ نیشان دا، لێ تەھرانێ داخوازا رۆنیکرنا ئێریشێ ژ واشنگتۆنێ کر و گۆت، وەک پشتەڤانا سەرەکی یا ئیسرایلێ، دڤێت ئامەریکا رۆنیکرنەکێ بدە.
