ناڤەندێن ھەوالگیریێ: داعش پلان دکە ئێریشی چەند دەڤەرێن سووریێ بکە

چەند ئاژانسێن هه‌والگیریێ ھشیاری دان کو چالاکیێن داعشێ ل سووریێ زێدە بوونە، ژ سالا 2017 ڤە ژی، مەھا ئادارا بۆری یا ھەری توند بوو ل بیابانا سووریێ.

مەترسیا داعشێ ل سووریێ ھەر کو دچە زێدە دبە، ل گۆر چەند راپۆرتان، ب رێیا شانەیێن خوەیێن رازایی، داعش پلانا ئۆپەراسیۆنان ل پرانیا دەڤەرێن سووریەیێ دانیە.

داتایێن فەرماندەیا ناڤەندی یا ئامەریکی ھەژمارا چەکدارێن داعشێ ل ئیراق و سوورییێ ب نێزیکی 2500 چەکداران تەخمین دکن، کو ئەڤ ژی دو قاتان ژ تەخمینێن داویا سالا بۆری زێدەترە.

ناڤەندا پرۆژەیا رووبرووبوونا توندرەویێ دەستپێکا ڤێ ھەفتەیێ د راپۆرتەکێ دە گۆت، داعشێ ژ دەستپێکا ئیسال ڤە ھەری کێم 69 ئێریش ل ناڤەراستا سووریەیێ پێک ئانینە و د ئەنجامێ دە 84 لەشکەرێن ئارتێشا سوورییێ و 44 سڤیل ھاتنە کوشتن.

ھەروھا ئاماژە ب وێ کر، پرانیا ئێریشان ل ھەرێمێن بیابانێ کو دکەڤن ناڤەندا سووریەیێ، ھاتن کرن.

ل گۆری ناڤەندا پرۆژەیا رووبرووبوونا توندرەویێ، د مەھا ئادارا ئیسال دە، داعشێ ھەری زێدە ل ناڤەندا سووریێ چالاکی پێک ئانینە.

ھەروھا ھێزێن سووریەیا دەمۆکراتیک (ھەسەدێ) ئاشکەرە کر، داعشێ د مەھا ئادارێ دە 27 ئێریش، د مەھا شباتێ دە ژی 26 و د مەھا چلە دە ژی 16 ئێریش پێک ئانینە.

د ڤێ ناڤبەرێ دە، ئالیکارێ ئەنستیتویا بەرەڤانیا دەمۆکراسیێ یا بنگەھا ل واشنگتۆنێ یە بیل رۆگۆ گۆتبوو، پشتی ژدەستدانا دەڤەرێن خوەیێن سەرەکی، داعش ھەول ددە ھەبوونا خوە ب رێیا شانێن رازایی بپارێزە.

تەکەز کر ژی، داعش تێک نەچوویە، ب تایبەتی پشتی لاوازبوونا ھەڤاھەنگیا رووسیا و ئامەریکا ل سوورییێ دەربارێ گەفێن داعشێ دە، مەترسیا وێ رێخستنێ زێدە بوویە.

ھەڤدەم لگەل زێدەبوونا ئێریشێن داعشێ، فەرمانداریا ناڤەندی یا ئامەریکایێ (سێنتکۆم) دوھی دا زانین، وان ب ھەڤکاریا ھێزێن ئەولەکاریا ئیراقێ و ھێزێن سووریەیا دەمۆکراتیک (ھەسەدێ)، د 3 مەھان دە 94 ئۆپەراسیۆن ل دژی چەکدارێن داعشێ ل ئیراق و سوورییێ کرنە.