مالباتا دۆرسن رەڤاندنا 2 ئەندامێن وێ ل دێرکا رۆژئاڤایێ کوردستانێ شەرمەزار دکە و بانگ ل ھەڤپەیمانیا ناڤدەولەتی و رێخستنێن ناڤدەولەتی دکە، کو فشارێ ل رێڤەبەریا پەیەدێ و ھەسەدێ بکن، دا کو ھەر دو ئەندامێن وێ مالبەتێ، حەسام دۆرسن و بەھزاد دۆرسن ئازاد بکن.
ئەندامێ پۆلیتبیرۆیا پارتیا دەمۆکراتا کوردستان – سووریا بەھزاد دۆرسن کو ژ سالا 2012 ڤە رەڤاندییە و ئەندامێ کۆمیتا ھەرێمی یا پارتیا گەل یا کوردستانی – سووریا و ئەندامێ ئەنجوومەنا نشتمانی یا کوردی حەسام دۆرسن ژ رۆژا 1 نیسانا 2024 ڤە ھاتیە رەڤاندن، مالباتا دۆرسن دەربارێ ئازادکرنا وان دە، داخویانیەک ژ رایا گشتی رە بەلاڤ کر:
داخویانیەک ژ رایا گشتی رە
وەکە بەردەوامیەکێ د سیاسەتا بێدەنگکرن، قرکرن و گرتنێ دە، چەکدارێن پەیەدێ ئەندامێ کۆمیتا ھەرێمی یا پارتیا گەل یا کوردستانی – سووریا و ئەندامێ ئەنجوومەنا نشتمانی یا کوردی حەسام دۆرسن، دەمژمێر 11 ئێڤارێ رۆژا دوشەمێ 1 نیسانێ، ل ناڤەندا باژارێ دێرکێ ب ئۆتۆمبیلا وی رەڤاندن.
تەڤی دووڤچوونا مە بۆ ناڤەندێن و دەزگەھێن پەیەدێ، وان ھەبوونا وی ل با خوە رەد کر، کو ئەڤ یەک بوو سەدەما پەیداکرنا مەترسیەکا جدی ل با مە ل سەر ژیانا وی، نەخاسم حەسام دۆرسن نەخوەشە و برینەکا کەڤن د سەرێ وی دە ھەیە.
د دەمەکێ دە کو ئەم ڤێ رەڤاندنێ شەرمەزار دکن، ئەم بانگ ل ھەڤپەیمانیا ناڤدەولەتی و رێخستنێن ناڤدەولەتی یێن ل سووریێ دکن، کو فشارێ ل رێڤەبەریا پەیەدێ و ھێزێن سووریا دەمۆکراتیک بکن دا کو ئەندامێ پۆلیتبیرۆیا پارتیا دەمۆکراتا کوردستان – سووریا بەھزاد دۆرسن، کو ژ سالا 2012 ڤە رەڤاندییە، و حەسام دۆرسن، ئەندامێ کۆمیتا ھەرێمی یا پارتیا گەل یا کوردستانی – سووریا، سەربەست وەرن بەردان و ژ بۆ مسۆگەرکرنا ئەولەھیا وان، ژ بەر کو ژ دەما ھاتنە رەڤاندن چارەنڤیسا وان نە دیارە، و ئەم بانگ دکن کو سینۆرەک ژ ڤان کریاران رە وەرە دایین.
ئەم تەکەز دکن کو ئەڤ بوویەرێن رەڤاندنێ یێن بەردەوام بنپێکرنەکا ئەشکەرەیە ژ مافێن ھەری بنگەھین یێن مرۆڤی رە د ژیانا بروومەت دە ل سەر خاکا خوە بژین و ئەڤ کریار تو کوردەکی بروومەت ژ تێکۆشینا دۆزا گەلێ خوە دوور ناخە.
بنەمالا دۆرسن
7 نیسانا 2024
