ئەمێ هلبژارتنێن 31ێ ئادارێ و ئەنجامێن وان هێژ زێدەتر نیقاش بکن. فەنۆمەنێ هلبژارتنێ ئەو مامێ کو ژ لەشکەرێن دەنگدێر یێن ئانی شرنەخێ رە پرسی، «ژ من رە ببێژن هوون ژ کو دەرێ نە؟» کوردەکی ل سەرێ وی جەمەدانی ئەڤ پرس ژ دەنگدێرێن ئه‌و ئانی شرنەخێ پرسی. وی مامی حەق کر کو ببە «دیارده». ب راستی ئەو هەلوەستەک ل دژی کۆلۆنیالیستان بوو و هەلبەت ئەو مام بوو بەردەڤکێ هەموو هەست و هەلوەستا کوردان. هەیا ڤێ قاسێ هەر تشت خوەش و باشە. لێ هەر تشت ب ڤێ خوەشییا کو د ناڤ دەقەیەکێ دا جهـ دگرە ب داوی نابە.
دەما کو کوردان ب کێفخوەشی ل مەدیایا جڤاکی وێنەیێ «مامێ سلێمان» یێ کو ل دژی کۆلۆنیالیزمێ هەلوەست نیشان دای دگەریان، مە دیت کو وێنەیا وی ل گه‌ل «توولای حاتمۆگوڵار» هات پارڤەکرن. ڤێ جارێ ئه‌و بێ جەمەدانی بوو و دەستێ خوە دانابوو سەر ملێ حاتمۆگوڵار. ل ئالیێ دن توولای حاتمۆگوڵار ب پۆزبلندیا تکربوونا خوە دگۆت: «بنەرن، من کوردێ وە ئانی جەم خوە» دێ بێژی قەی ژ پۆزێ مسته‌فا کەمال خولقی یە. ل سەر روویێ توولای یه‌ك زڕە-مسقال دلسۆزی و حەزکرن تونە بوو، بەرۆڤاژی ڤێ یەکێ، ئه‌و تەنێ دخوازە ژ کوردان رە خوە شرین بکە. ب تایبەتی دەما کو ل وانێ توولای دئاخڤی گەل ب قیرینا درووشما «لەیلا زانا» خوەست توولای ژ وان رە نەپەییڤە. پشت رە توولایێ ئاورەک ب کەرب و کین ئاڤێت لەیلا زانایێ.
دەما کو مە ئەڤ راستی دیت، ده‌ما کو سلێمانێ کورد ژ لەشکەرێ ترک رە گۆتی، «ژ من رە بێژە تو ژ کویی» ئەم کێفخوەش و سەربلند بوون، لێ دەما کو مە دەستێ وی ل سەر ملێ توولای دیتی ب وی قاسی ئه‌م پڕ خەمگین بوون. ژ بەر کو ب راستی پێدڤی بوو مامێ سلێمان ژ توولای پرسی با: «کا بێژە، تە دەنگێ خوە دا کێ؟ بپەیڤن، تو وەکە قایووم هاتیه دامه‌زراندن؟» ئەم ل بەندێ بوون کو ئەڤ پرسە ژ توولایێ کربا. ژ بەر کو ناسکرنا لەشکەر، پارێزگار و نوونەرێن داگیرکەران هێسانە. تشتێ زەحمەت ئەوە کو مرۆڤ میسیۆنەرێن ترک و ئەرکدارێن داگیرکەران یێن کو وه‌كه دۆستێ کوردان خوه‌یا دكه‌ن، ناس بكه.
دێ نەشاش بە کو ئەم ناڤێ توولای حاتمۆگوڵار د رێزا «یالچین کوچوک، ئەرتوگرول کورکچوو، سڕی سوورەییا ئۆندەر» ب هەژمێرین. حاتمۆگوڵار کو عەرەبه‌كێ عەلەوی یە، د هەمان دەمێ دا سەرۆکێ رێخستنەکا چەپگرە و د ڤێ هلبژارتنێ دا ژ بۆ پارتیا کو سەرۆکاتیا وێ دکە SKYP خوەست دەنگێن خوە بدن جه‌هه‌پێ. ب ئاوایه‌کێ ڤەکری دەنگێ خوە دایە جه‌هه‌پێ. چاوا کو مامێ سلێمان چاوا کو تلییا خوە ل لەشکەرێن ترک هەژاند و گۆت کا بێژە تو ژ کوویی؟ دڤیابوو ژ توولای ژی پرسی با کا بێژە تە دەنگێ خوە دا کیژان پارتییێ. لێ مخابن ناپرسە. ئەڤ ئه‌زموونا له‌عنەتکریا كو سه‌د سالن کورد ب کۆمارا ترکیەیێ ڤه گرێدانه.
ل بەرخوە بدن، بمرن، شەر بکن و د داویێ دە کەد و خەبات و خوین و ئیزا و ژیانا وە دێ كه‌ڤیته د قاسەیا دەولەتا ترک دا. ژ بۆ ترکان راست و چەپ تونە. هەر دو ژی ب هەبوونا خوە دەیندارێ هەبوونا دەولەتا ترکن. ژ بەر ڤێ یەکێ، هەردو باسک ژی کارێ میسیۆنەری دگێرن. بنێرە، ئەز نابێژم سیخوورن، سیخوورتی تشتەکێ جودایە. ژ بۆ سیخوربوونێ باوەری هەوجە ناکە، ب گەفخوارنێ ژی هنەک دکارن ببن سیخوور لێ نکارن ببن مسیۆنەر. ژبۆ میسیۆنەر باوەری ئه‌ساسه. ئەڤ کەسێن مە بەحس کری میسیۆنەرێن دەولەتا داگیرکەرن و وەکە دۆستێ کوردان تەڤدگەرن.
هەگەر رۆژەکێ کورد ببێژن «ئەم دخوازن ژ کۆمارا ترکیەیێ ڤەقەتین» پێشی ئەڤ کەسێن مسیۆنەر دێ ل دژی کوردان دەرکەڤن. دەردێ وان نە ئازادیا کوردانە، ئەڤ سۆندخوارینە کو دەولەتا کەمالیست زندی بهێلن. دۆستانی یا وان ل گه‌ل کوردان تونەیه، تەنێ ئەو دۆستانی ئەرکە. ئەرکا وان ئەوە کو کوردان نێزی ئیدۆلۆژیا چەپگریێ بکن و د بن سیوانا دەولەتا ترک دا بهێلن.
میسیۆنەرێ هەری پۆپولەرێ ڤان 10 سالێن داوی «ئەرتوگرول کورکچوو»، پشتی هلبژارتنێ ب ئاوایەکی پر ئەحمەقی ئاخڤی و گۆت: «بەرپرسیارییا مە ئەوە کو ئەم سەردەما ئاكه‌پێ د هلبژارتنێن 2028 ژناڤببه‌ین». چما ئەمێ سەردەما ئاكه‌پێ گرین، دا کو جه‌هه‌په بهێت؟ جه‌هه‌په دێ چ بۆ مە بکە، جه‌هه‌په ژی نکارە ببێژە «دڤێ ناڤێ کورد د دەستوورا بنگەهین دا بێ نڤیساندن». گەلۆ کورد چما سەردەما جه‌هه‌پێ بدن دەستپێکرن؟ کوردان میسیۆنەکە وه‌ها نینە.نە هەوجەیە کو کورد ببن خوینا تازه یا کۆمارێ و نه‌ژی ببن گۆپال د دەستێ دەولەتا داگیرکەر دا کو بالانسا سیستەما خوە پێ چێبکە.
گەر کورد دخوازن سەرێ خوە ژ ڤێ هەریا کۆلۆنیالیزمێ دەربێخن، دڤێ پێشی ڤان میسیۆنەرێن دەولەتێ کو د بن ناڤێ چەپێن ترک، رەوشەنبیرێن ترک و دۆستێن ترک دا ل سەر پشتا خوە باڤێژن. قەیوومێن ڤەکرییێن دەولەتێ ل سەر شارەداریێن کوردانە، ئەڤ قەیوومێن ڤەشارتی ژ د ناڤا پارتیا دەمێ دا نە.
لێ مخابن کورد د ناڤا هەرییێ دا وسا ئاسێ مانە کو ئەڤ میسیۆنەر دو گۆتنێن خوەش دبێژن، پچەکی پەسنێ مە ددن، ئەم کورد وەکە بەرخێ قوربانێ سەرە خوە درێژ دکه‌ینه بەر دەڤێ کێرا وان. ب ڤان چاڤان مه دیت کو جوانێن کورد ئەرتوگرول کورکچویێ کو چەپێن ترک ژی ژێ رە دگۆت «ئاژانێ دەولەتێیە، تەسلیمی دەولەتێ بوویە» ل سەر ملێن خوە دگێراندن. مە ب ڤان چاڤان کوردێن کو دخوەستن دەستێ سەرۆکێ TKP ێ ئەرکان باش ماچ بکن، دیتن.
ئەرێ راستە کورد باش ل بەرخوە ددن، باش دمرن، باش شەر دکن، لێ ژ بۆ کێ، ژ بۆ چ؟ هەتا کو ئەم کورد نەرابن و نه پرسن؛ «باخڤە، تو میسیۆنەرێ کێیی؟ باخڤە، تو قه‌یوومێ کێیی؟ هەیا کو ئەم ل هەمبەر هەر جورە کۆلۆنیالیزم و بەرماهیێن کۆلۆنیالیست ڤێ هەلوەستا کوردستانی نیشان نەکن ئەوێ کارێ مە پڕ زەهمەت بە.
