د دەربارێ کەشتیا کو ل تەنگاڤا ھورموزێ ھاتیە دەستەسەرکرن، ئیرانێ داخویانیەک دا. د ڤێ داخویانیا خوە دە سوپایێ پاسدارێن ئیرانێ راگھاند، ژ بەر کو کەشتی ب ئیسرایلێ رە تێکلدارە، دێ بەر ب ئاڤا ئیرانێ ڤە هێت کێشان. ئەڤ کەشتیە سەر ب شیرکەتا زۆدیاک ماریتایمە کو خوەدیێ وێ ملیاردێرێ ئیسرائیلی ئەیال ئۆفەرە.
ئاژانسا “ئیرانا” یا دەولەتا ئیرانێ پشتراست کر کو کەشتیا ب ناڤێ MSC Aries ل دەرگەھێ تەنگاڤا ھورموزێ ژ ئالیێ ھێزێن سوپایێ پاسدارێن ئیرانێ ڤە ھاتیە دەستەسەرکرن. د نووچەیا ئیرنایێ دە ھات دیارکرن کو کەشتیا ب ئالایێ پۆرتوگالێ ب ھنجەتا کو تێکلیا وێ ب ئیسرایلێ رە ھەیە ھات دەستەسەرکرن.
ل گۆر نووچەیێ، ھێزێن تایبەت یێن ھێزێن دەریایی یێن ئیرانێ ل کەشتیێ سوار بوونە و ئۆپەراسیۆنەک ل دار خستنە. د دیمەنێن مەدیا جڤاکی دە تێ دیتن کو کۆماندۆ ل کەشتیێ سوار دبن.
ئەڤ بوویەر د دەمەکێ دە تێ، پشتی ئارمانجکرنا ئاڤاھیەکێ ل تەنشت کۆنسولخانەیا ئیرانێ ل شامێ کو تێ دە 7 ئەندامێن پاسدارێن ئیرانێ ھاتن کوشتن، ئالۆزی ل ھەرێمێ زێدە بوویە، ئامەریکایێ ژی وەکە بەرسڤەکێ ل سەر ئەگەرا ئێریشەکا ئاسمانی یا ئیرانێ، ھێزەکا لەشکەری شاندیە ھەرێمێ.
