بەردەڤکێ ئارتێشا ئیسرایلێ راگھاند، ئیرانێ ب دەھان مووشەک و درۆنان ئێریشی ئیسرایلێ کریە و پرانیا وان ل دەرڤەیی وەلات ھاتنە پووچکرن.
بەردەڤکێ ئارتێشا ئیسرایلێ دانیال ھەگاری ئیرۆ 14 نیسانێ راگهاند، ئیرانێ ھەتا نھا 300 درۆن و مووشەک ئاڤێتنە ئیسرایلێ و %99 ژ وان ل دەرڤەیی وەلات ھاتنە پووچکرن.
ئاماژە ب وێ ژی کر، ئارتێشا ئیسرایلێ د تێکبرنا ئێریشا ئیرانێ دە بسەر کەت و تەکەز کر کو ئەو بوویەر ب داوی نەبوویە و ئارتێشا ئیسرایلێ ھێژ د ئامادەباشیێ دەیە.
بەردەڤکێ ئارتێشا ئیسرایلێ گۆت ژی: “ئیرانێ ئیشەڤ کارەکی مەترسیدار کریە و دخوازە ئالۆزی ل رۆژھلاتا ناڤین دەرکەڤە.”
دەربارێ بەرسڤا ئیسرایلێ ل ئێریشا ئیرانێ دە ژی، ھەگاری گۆت: “پلان ب بەردەوامی تێنە ئامادەکرن، ئەم ئالتەرناتیفان گۆتووبێژ دکن و ژ بۆ پاراستنا وەلاتیێن خوە، ئەمێ ھەر تشتی بکن.”
دەرەنگا شەڤا بۆری دەمژمێر دەردۆرا 11:00، سوپایێ پاسدارێن ئیرانێ ب دەھان مووشەک و درۆنان ئێرشی ئیسرایلێ کربوو.
ئێریشا تەھرانێ وەک بەرسڤەکێ ل سەر کوشتنا 7 ئەندامێن سوپایێ پاسداران تێ، کو د ئێریشەکە ئیسرایلێ ل سەر ئاڤاھیەکێ نێزیکی کۆنسولخانەیا وێ ل شامێ دە ھاتبوون ئارمانجکرن.
سوپایێ پاسدارێن ئیرانێ دەستپێکرنا ئێریشا ل سەر ئیسرایلێ پشتراست کر و گۆت کو ئەو ئۆپەراسیۆن ب “سۆزەکا راست” بناڤ کر.
