سەرۆکێ ئامەریکایێ جۆ بایدن پشتراست کر، ئارتێشا ئامەریکایێ ئالیکاریا ئیسرایلێ کر و ھەموو درۆن و مووشەکێن کو ژ ئیرانێ دھاتن سەر ئیسرایلێ، خستن خوارێ. گۆت ژی، ئەو دێ ب ھەڤاھەنگیا لگەل G7 بەرسڤەکا یەکگرتی یا دیپلۆماتیک ل ھەمبەر ئێرشا ئیرانێ بدن.
بایدن د داخویانیەکێ دە گۆت: “ئیران و ئالیگرێن وێ یێن کو ل یەمەن، سووریێ و ئیراقێ کار دکن – ئێریشەکا ئاسمانی ل دژی ناڤەندێن لەشکەری یێن ئیسرایلێ پێک ئانین. ئەز ڤان ئێریشان ب توندی شەرمەزار دکم.”
گۆت ژی: “ل گۆری رێنمایێن من و ب ئارمانجا بەرەڤانیکرنا ل ئیسرایلێ، ئارتێشا ئامەریکایێ د ھەفتەیا دەرباسبوویی دە فرۆکە و سیستەما ل دژی مووشەکێن بالستیک شاندن ناڤچەیێ.”
ئاماژە ب وێ ژی کر: “ب سایا ڤان بجھکرن و ژێھاتیبوونا لەشکەرێن مەیێن ئاوارتە، مە ئالیکاریا ئیسرایلێ کر کو ھەما ھەما ھەموو درۆن و مووشەکێن کو دھاتن سەر ئیسرایلی کەتن خوارێ.”
بایدن د داخویانیا خوە دە تەکەز کر، “رووبرووبوونا ئێرشێن ئیرانێ، پەیامەکا زەلال ددە ئیرانێ کو ئەو نکارە ئەولەھیا ئیسرایلێ ب ئاوایەکی ب باندۆر تەھدید بکە.”
سەرۆکێ ئامەریکایێ دیار کر، وی لگەل سەرۆکوەزیرێ ئیسرایلێ بنیامین نەتانیاھو ئاخڤیە و پابەندبوونا وەلاتێ خوە یا ژ بۆ ئەولەھیا ئیسرایلێ دوبارە کریە.
ھەروھا گۆت: “من ژێ رە گۆت کو ئیسرایل شیانەکا ب باندۆر ژ بۆ بەرەڤانیکرنێ و تێکبرنا ئێریشان نیشان دا و پەیامەکا زەلال ژ دژبەرێن خوە رە شاند کو ئەو نکارن ب باندۆر ئەولەھیا ئیسرایلێ تەھدید بکن.”
بایدن د داخویانیا خوە دیار کر: “ئەزێ سبە لگەل ھەڤالێن خوە یێن سەرکردە یێن G7 بجڤم دا کو بەرسڤەکا دیپلۆماتیک یا یەکگرتی ل ھەمبەر ئێریشا ھۆڤانەیا ئیرانێ بدن.”
ھەروھا گۆت ژی: “تیما من دێ ب ھەڤکارێن مەیێن ل سەرانسەرێ ھەرێمێ رە پێوەندیێ بکن. ئەم دێ لگەل رێبەرێن ئیسرایلێ ژی د ناڤ تێکلیان دە بن.”
سەرۆکێ ئامەریکایێ گۆت ژی: “تەڤی کو ئیرۆ ئێریش ل سەر ھێز و ناڤەندێن مە نەھاتیە کرن ژی، ئەم دێ ل ھەمبەر ھەموو گەفان ھشیار بن و ژ بۆ پاراستنا گەلێ خوە، ھەموو تەدبیران بگرن.”
