وەزیرێ بەرەڤانیێ یێ ئسرائیلێ ب فەرمی سپاسیا ئهمهریكایێ کر ژ بۆ ئالیکاریا وان د ئێخستنا مووشەک و فرۆکەیێن بێ پیلۆتێن ئیرانێ دە.
ئاژانسا NBC د راپۆرەکێ دە راگھاند کو د ئەنجاما ئێریشا ئیرانێ یا سەر ئیسرائیلێ ب تەنێ 31 کەس ب سڤکی بریندار بوونە و هەموو ھاتنە دەرمانکرن. ھێژایی گۆتنێ یە کو بەشەکێ بەرچاڤ ژ وان 31 کەسان ژ بەر ترسێ تووشی نیگەرانیێ بوونە و یێن دن ژی دەما دچوون ستارگەھان ژ بەر قەرەبالغیێ کەتنە و ب سڤکی بریندار بوونە و پشتی دەرمانکرنێ ھاتنە شاندن بۆ مالێن خوە.
تەڤی کو ئیران دخوازە ب رێیا مەدیایا خوە نیشان بدە کو دەربەکە بباندۆر ل ئسرائیلێ خستیە، لێ چاڤدێرێن لەشکەری و جیۆپۆلیتیک د وێ باوەریێ دە نە کو ئەڤ ئێریش نە سەرکەفتنەکە ژ بۆ ئیرانیان، بەلکو د راستیێ دە تێکچوونەکە مەزن بوو. ژ بەر کو ئیران ب دەھان سالە ب فرۆکەیێن بێ فرۆکەڤان و مووشەکێن خوە گەفا تونەکرنا ئسرائیلێ دخوە، لێ دەرکەت ھۆلێ کو شیانا بەرەڤانیا ئەسمانییا ئسرائیلێ ژ شیانا مووشەکی یا ئیرانێ گەلەک زێدەترە و پرانیا فرۆکەیێن بێ فرۆکەڤان یێن ئیرانێ ھێ بەری کو بگھن ئەسمانێ ئسرائیلێ ھاتنە تەقاندن و گەلەک کەس وەکە حەنەک ڤان ئیریشێن ئیرانێ وەکە ئێریشا فیشەکێن ھەوایی ب ناڤ دکن. شەرمەکە دن ژی ئەو بوو کو مەدیایا ئیرانێ و ھەتا دەنگ و رەنگێ فەرمییێ وی وەلاتی، ب دەرەو ڤیدیۆ و وێنەیێن ئاگرپێکەتنا تەکساسێ د ڤان سالێن داوی دە پارڤە کرن و وەکە دەرئەنجاما ئێرشێن مووشەکی یا ئیرانێ بۆ سەر ئسرایلێ دان نیشاندان. لێ ئەڤ گۆتنێن شاش یێن ئیرانێ ژ ئالیێ بکارھێنەرێن تۆرا جڤاکی ڤە زوو ھاتن رەدکرن.
ل گۆری ئاماران و چاڤدێرێن لەشکەری و جیۆپۆلیتیک، ئێرشێن ئیرانێ ھەری کێم دەستکەفتیێن لەشکەری ب دەست خستنە، تەنێ دەستکەفت ژی ئەوە کو ئیران دبێژە، ئەگەر فرۆکەیێن بێ فرۆکەڤان و مووشەکێن وێ نەیێن راوەستاندن، ئەو دکارن ژ ئیرانێ بگھێژن ناڤ ئاخا ئسرائیلێ، کو ئەڤ ژی دکارە د مژارا سنۆردارکرنا شیانێن سەربازی یێن ئیرانێ ژ ئالیێ جڤاکا ناڤدەولتی ڤە، ب تایبەتی د وارێ گهشتنا ئیرانێ ب چەکێن ناڤۆکی، زیانا وێ بۆ ئیرانێ ژ سوودێ وێ ئێریشێ زێدەترە.
ئێریشێن ئیرانێ ژ ئالیێ پرانیا ھێزێن مەزن یێن جیھانێ ڤە ب توندی ھات شەرمەزارکرن و ل سەر داخوازا ئسرائیلێ دێ جڤینەکە ئاوارتەیا ئەنجوومەنا ئاسایشا ناڤدەولەتی وەرە لدارخستن. چینێ ژی پشتگری نەدا ئیرانێ و بانگ ل ھەر دو ئالیان کر کو خوە ژ کارڤەدانێن توند دوور بگرن. دکارە بێ گۆتن کو ئێریشێن ئیرانێ نە د وارێ دیپلۆماتیک دە د بەرژەوەندیا ئیرانێ دە نەبوون.
ئالیێن پرۆپاگاندا و شەرێ دەروونی یێن ئێریشا ئیرانێ یا ل سەر ئسرائیلێ
د ڤان ئێریشان دە ژ ئارمانجێن لەشکەری و سیاسی زێدەتر، پرۆپاگاندا و شەرێ پسیکۆلۆژیک بوو. زێدەتری 10 سالانە ئسرائیل ب ئەشکەرە پاسدارێن ئیرانێ ل سووریێ دکە ئارمانج و ئیران ژی بێیی بەرتەکەکە جدی گوھێ خوە ژێ رە کەڕ کریە. د ڤان سالێن داوی دە ژی، ئێریشێن ئسرائیلی خوە گھەشتن ھوندرێ ئیرانێ، د ئەنجامێ دە پسپۆرێن چەکێن ناڤۆکی ھاتن کوشتن، ھەموو ئارشیڤێن پرۆژەیا ناڤۆکییا ئیرانێ ھاتن دزین و ب دەھان شوونوارێن تێکلداری چالاکیێن ئەتۆمی یێن رەژیمێ ھاتن تەقاندن، ڤان ئێریشان ئیران قەلس کربوو، د راستیێ دە ڤان ئێریشێن ئسرائیلێ گومان خستبوو سەر گەفێن ئیرانێ یێن ل دژی ئسرائیلێ و خوە کەسێن سەر ب رەژێما ئیرانێ ب ئەشکەرە باس ل ڤێ یەکێ دکرن کو ئیران د بەرسڤدایینا ئسرائیلێ دە لاوازە.
پشتی ئێریشا ئسرائیلی ل سەر ئاڤاھیەک ل کێلەکا بالیۆزخانهیا ئیرانێ ل شامێ و کوشتنا ب دەھان پاسدارێن رەژیمێ، ژ وان 7 فەرماندارێن پایەبلندێن پاسدارێن ئیرانێ و کەسایەتیێن ناڤدارێن لەشکەری ل ئیرانێ، ئێدی رایەدارێن ئیرانێ نەما بکاربن ب دەرەو و گەفێن بێی کریار خوە ژ ب هێڤیبوونا کەسێن ئالیگرێ رەژیمێ بۆ بەرسڤدایینێ دەرباس بکن. لەوما بەرپرسێن پلەبلندێن رەژیمێ ژ وان کەسێ یەکەمێ رەژیمێ خامنەیی، سۆزا تۆلھلدانێ ژ ئسرائیلێ دان، و ئێریشا شەڤا دەرباسبوویی د راستیێ دە زێدەتر ژ بەرسڤدانا ئێریشێن ئارتێشا ئسرایلێ، بەرسڤەک بوو ژ بۆی وێ چاڤەرێبوونا ئالیگرێن رەژێما ئیرانێ.
مە ژ بیر نەکریە کو دەما ئهمهریكا قاسم سلێمانی و مەھدی موھەندس کوشتن، ئیرانێ دیسا سۆزا تۆلھلدانێ دا و ب ئێریشا ل سەر ھەرێما کوردستانێ، چەند مووشەک ئاڤێتن بارەگەھا لەشکەرییا ئهمهریكایێ ل ئیراقێ، و پشترە دەرکەت هۆلێ ئەڤ ئێریش ب هەماهەنگیا ب ئهمهریكایێ رە هاتیە کرن و ترۆمپ ژی ئەڤ یەک ب ئەشکەرەیێ راگهاند. ئیرانێ خوەستبوو ب وێ ئێریشێ ئالیگرێن خوە رازی بکە. د راستی دە ئیران ناخوازە بەردێلا شەرەکی گران ل گەل ئسرائیل و ئهمهریكایێ بدە، ژ بەر کو دزانە د ئەگەرا شەرەکی وھا دە، خاکا ئیرانێ دێ ببە ئارمانج، کو نە ب دلێ بەرپرسێن رەژیما ئیسلامی یە. ئارمانجا ئیرانێ تەنێ ئەوە کو ب رێیا ملیسێن خوە یێن ل ھەرێمێ، ب تایبەتی ل سووریێ، ئیراق (ملیسێن حەشدا شەعبی)، لبنان (حزبوللاھ)، یەمەن (حووسی و ھود.) سەرێشیێ ژ ئهمهریكا و ھەڤالبەندێن وێ رە چێبکە، و وەکە کارتەکە سیاسی بکار بینە و ب ڤێ یەکێ باجێ ژ جڤاکا ناڤدەولەتی و ب تایبەتی ئهمهریكایێ وەربگرە و گڤاشێن ڤی وەلاتی ل سەر خوە کێم بکە.
گەلەک وەلاتێن جیھانێ ب تایبەتی ئیران و ئهمهریكا دخوازن ئێریشا شەڤا بووری یا ئیرانێ بۆ سەر ئسرائیلێ ببە داویا ڤان ئالۆزیێن نوو و ناخوازن زێدەتر بەرفرههـ ببە و ببە سەدەما شەرەکی گران. ئهمهریكا سەرەرایی پیرۆزکرنا سەرکەفتنا ئسرائیلیان د بەرەڤانیکرن و تێکبرنا ئێریشێن ئیرانێ دە، ب ئەشکەرە ژ ئسرائیلیان رە دبێژە کو ئەگەر ئەو بخوازن ئێریشی چەند مەبەستێن د ناڤ ئاخا ئیرانێ دە بکن، واشنگتۆن لگەل وان نامینە. گەلەک چاڤدێر د وێ باوەریێ دە نە کو د ئێریشا سەر ئسرائیلێ دە ھەڤاھەنگیەکە ڤەشارتی د ناڤبەرا ئیران و ئهمهریكایێ دە ھەبوویە و بەرپرسێن ئیرانێ بەریا ئێریشان سینیالێن جوربجور ژ کۆشکا سپی رە شاندنە. ل گۆری نووچەیا ئاژانسا رۆیتەرزێ کو ژ زارێ رایەدارێن پایەبلندێن دیپلۆماتیکێن ئیرانی و ئهمهریكایێ پارڤە کریە، “ئیرانێ پەیامەک ژ ئهمهریكایێ رە وەکە گرینگترین ھەڤالبەندا ئسرائیلێ شاندیە و گۆتیە، ئەو ناخوازە ئالۆزی زێدەتر ببە و سۆز دایە کو چ کریارێن شاش ئەنجام نەدە.”
پشتی ئێریشێ ژی ئاژانسا نووچەیان یا تەسنیم یا سەر ب سپایێ پاسدارێن ئیرانێ راگهاند، “ئەگەر ئسرائیل ئێریشی خاکا ئیرانێ بکە، ئەمێ بەرسڤێ بدن.” ئانکو ئیران ب ئەشکەرە رادگهینە کو ئەگەر ئسرائیل ئێریشی سەر مە نەکە، ئەم ژی ئێریش ناکن.
ب کورتی، ئێریشێن ئیرانێ یێن ل سەر ئسرائیلێ ژ ئالیێ لەشکەری، دیپلۆماتیک و جیۆپۆلیتیک ڤە ژ بۆ رەژیما ئیرانێ تشتەک ب دەست نەخست، د راستیێ دە، ئیرانێ ئەڤ ئێریش تەنێ ژ بۆ رازیکرنا گرسەیێن دەردۆرا خوە و رەواکرنا دەرەوا خوەیا ب دەھان سالان کو دکارە د شەڤەکێ دە ئسرائیل تێک ببە، پێک ئانیە، گەر نا ئێریشەک کو نکارە خوینێ ژ پۆزا کەسەکی ئیسرائیلی بینە، تو جاری نابە تۆلھلدانا ئێریشا کو ب دەھان فەرماندارێن پایەبلندێن پاسدارێن شۆرەشا ئیرانێ تێ دە ھاتن کوشتن. د نها دە جڤاکا ناڤنەتەوی نە ئالیگرێ شەرەکی نوو ل ھەرێمێ یە و نە ووسا دیار نابە کو ئسرائیل ئێریشەکە بەرفرەھ ل سەر خاکا ئیرانێ بکە. لێ هەگەر هن خالێن د ناڤا خاکا ئیرانێ دە بکە ئارمانج ژی دیسان ئیران وێ خوە لێ کەڕ بکە و نەوێرە خوە تووشی شەرێ ل دژی ئیسرائیل و ئهمهریكایێ بکە. ئەشکەرەیە کو دڤێ ئەم ژ بیر نەکن کو د رەوشێن وھا دە جارنان رەوش ژ کۆنترۆلێ دەردکەڤە و رێیەکێ دگرە کو دبە تو ئالیەکێ خوە ژێ رە ئامادە نەکربە.
