سەرۆکوەزیرێ ئیراقێ محەمەد شه‌یاع سوودانی ئیرۆ ل کۆچکا سپی ل گەل سەرۆکێ ئامەریکایێ جۆ بایدن دجڤە و ل سەر رێکەفتنا ستراتەژیکا بەغدا-واشنگتۆن و مژارێن دن یێن گرێدایی بهێزکرنا پێوەندیێن ئابۆری و سیاسی یێن د ناڤبەرا هەر دو وەلاتان دە گۆتووبێژان دکە.
سەرۆکوەزیرێ ئیراقێ محەمەد شه‌یاع ئیرۆ دانێ ئێڤارێ ل کۆچکا سپی ب سەرۆکێ ئامەریکایێ جۆ بایدن رە دجڤە. لێ بەریا جڤینێ، سوودانی دێ ب وەزیرێ دەرڤە ئانتۆنی بلنکەن، وەزیرێ بەرەڤانیێ ڵۆید ئاوستن و وەزیرا خەزینەیێ جانێت یلێن رە بجڤە.
تێ پێشبینیکرن د جڤینا سوودانی ب جانێت یلێن رە کو سەرۆکێ بانکا ناڤەندی ژی دێ تێ دە بەشدار بە، سزایێن ل دژی بانکێن ئیراقێ و دەرکەتنا دۆلار ب قاچاخی ژ ئیراقێ و ب تایبەت بۆ ئیرانێ وەرە گۆتووبێژکرن.
سوودانی رۆژا 13ێ نیسانێ دە ل سەر ڤەخوەندنا فەرمی یا سەرۆکێ ئامەریکایێ جۆ بایدن ل گەل شاندەکە حکوومەت، پارلامەنتۆ و سەکتۆرا تایبەت چوو واشنگتۆنێ.
سوودانی بەری کو بچە ل بەغدایێ گۆت، دێ هەژمارەک وەزیر، پارلامەنتەر و شێورمەند و نوونەرێن سەکتۆرا تایبەت، کارساز و پیشەساز ل گەل وی بن. ئارمانجا سەردانێ ژی، ئاکتیڤکرنا پەیمانێن ستراتەژی د وارێن ئەنەرژی، دارایی و بانکی، ڤەگوهەستنێ، شەرێ ل دژی گەندەلیێ و ڤەگەراندنا سامانێن ئیراقی ژ دەرڤە، هەروها خوەندنا بلند و گەشەپێدانا چاندینە.
