ئیرۆ 15/4/2024 ئێڤاری سەرۆکێ ئامەریکایێ جۆ بایدن ل کۆچکا سپی پێشوازی ل سەرۆکوەزیرێ ئیراقێ محەمەد شیاع سوودانی کر و جڤینەک پێکانین.
پشتی جڤینێ جۆ بایدن و محەمەد شیاع سوودانی جڤینەکا چاپەمەنیێ پێکانین و بایدن راگەھاند کو پشتی ئیرانێ ئێریشێ ئیسرایلێ کری، وان ھەموو جورە ھەولدان دانە و ھەڤکاریا ئیسرایلێ کرنە و شکەست ب وان ئێریشێن ئیرانێ ئانینە.
ھەروەھا گۆت، ئامەریکا پابەندە ب پاراستنا ئاساییشا ئیسرایلێ، ھەروەھا پابەندە ب ئاگربەست و ڤەگەرا رەڤاندیێن ئیسرایلێ یە. دەرڤەیی وێ ژی پابەندە ب پاراستنا ھەڤپەیمانێن خوەیێن ل ناڤچەیێ و ئیراق ژی د ناڤ دە.
سەرۆکێ ئامەریکایێ گۆت، ھەڤبەشیا ناڤبەرا ئیراق و ئامەریکایێ گەلەک گرنگە، د دەھ سالێن بۆری دە لەشکەرێن ئامەریکایێ مل ب ملێ لەشکەرێن ئیراقێ کار کرن ژ بۆ ژناڤبرنا داعشێ و راگەھاند: “مە چارچۆڤە و رێکەفتنەکا ستراتەژیک ل گەل ئیراقێ ھەیە.”
ژ ئالیێ خوە ڤە ژی سەرۆکوەزیرێ ئیراقێ محەمەد شیاع سوودانی سپاسیا بایدن ل ھەمبەر ڤەخواندنا وی یا ژ بۆ واشنگتۆنێ کر و راگەھاند کو رژدن ژ بۆ کارکرنا ل سەر رێکەفتنا چارچۆڤەیا ستراتەژیک. سوودانی دیار کر، ئەو داخواز دکن ئالۆزیێن ل ناڤچەیێ نەیێن بەرفرەھتر کرن.
