شێورمەندێ ئاسایشا نشتمانی یا ئیراقێ قاسم ئەل-ئەعرەجی دبێژە، دڤێ پەکەکە زووترین دەم چەکان دەینە و سەردانا سەرۆکۆمارێ ترکیێ رەجەب تەییب ئەردۆگان بۆ ئیراقێ د ڤێ مەھێ دە دێ ببە گاڤەکە مەزن ژ بۆ باشترکرنا پێوەندیێن د ناڤبەرا بەغدا و ئەنقەرێ دە.
ئەل-ئەعرەجی ژ رۆژنامەیا فەرمی یا سەباحێ رە راگھاند، سەردانا ئەردۆگان ژ بۆ ئیمزەکرنا پەیمانەکا ژھەڤتێگھشتنێ د چارچۆڤەیا پەیوەندیێن ستراتەژیکێن ناڤبەرا ئیراق و ترکیێ دە د وارێن ڤەگوھاستن، ئەنەرژی، ئەولەھی، ئابۆری و بازرگانیێ دەیە.
تەکەز کر، “سەرۆکوەزیرێ ئیراقێ محەمەد شیاع سوودانی گرینگیەکە مەزن دایە مژارا ئاڤێ و د ناڤبەرا ئیراق و ترکیێ دە کۆمیتەیەک بلند ھەیە ژ بۆ گۆتووبێژکرنا ڤێ مژارێ.”
هەر وەها راگهاند، “سەردانا ئەردۆگان ژ بۆ ئیراقێ گاڤەکە مەزنە ژ بۆ تێکلی، تێگھشتن و ھەڤکاریا د ناڤبەرا ھەر دو وەلاتان دە، ب تایبەتی کو ئیراق دخوازە سەدەمێن ناکۆکیێن خوە ب ترکیێ رە ب داوی بکە، یەک ژ وان سەدەمان ژی ھەبوونا پەکەکێ ل ناڤ ئاخا ئیراقێ یە، کو ئەڤ گرۆپا چەکدار ئێریشی سەر بەرژەوەندیێن هەر دو ولاتان دکە، دەستوورا ئیراقێ ژی ب ت ئاوا رێ ب کارەکی ب ڤی ئاوا نادە، لۆما ل گۆری دەستوورا بنگەھینا ئیراقێ، ژ بۆ بداویکرنا ڤێ رەوشێ دڤێ پەکەکە زوو دەست ژ چەکان بەردە و داویێ ب ڤێ رەوشێ بینە.”
ل گۆر مەدیایا ترکیەیێ، ژ زارێ ژێدەرێن سیاسی ل ئەنقەرێ، بریارە سەرۆکۆمارێ ترکیێ رەجەب تەیب ئەردۆگان د داویا مەھا نیسانێ دە سەردانا بەغدایێ بکە و ئەڤ یەکەم سەردانا وییە پشتی 12 سالان.
