ژنا رۆژنامەڤانا ئیرانی، ل تۆرا جڤاکی دە بەحسا وێ یەکێ کر کو ژ ئالیێ ھێزێن ئەولەھیا ئیرانێ ڤە دەستدرێژیا سەکسی ل سەر ھاتیە کرن و پشتی وێ ژی ھاتە گرتن.
ل گۆر زانیاریان رۆژا 16/4/2024 رۆژنامەڤان و خواندەڤانا زانینگەھا بەھەشتی یا تەھرانێ دینا قالیباف د تۆرا جڤاکی یا X دە پارڤەکرنەک بەلاڤ کر و نووچەیا گرتنا خوەیا ل مەترۆیا تەھرانێ راگەھاند و ئاشکەرا کر، ژ ئالیێ ھێزێن ئەولەھیا ئیرانێ ڤە دەستدرێژیا سەکسی ل سەر ھاتیە کرن و پشتی وێ ژی ھاتیە گرتن.
دینا قالیباف نڤیسا خوە دە راگەھاند: دوھ ل ئۆدەیا پۆلیسێ راوەستەکا مەترۆیا سادقیەیا ل تەھرانێ، دەما کو ئەز رژدبووم ل سەر وێ یەکێ کو مادەم ئەز باج ددمە دەولەتێ مافێ سوود و مفا وەرگرتنا من ژ مەترۆیێ ژی ھەیە، لێ ب بکارئانینا تووندیێ ڤە ئەز برم ئۆدەیەکی و ئاموورا ئەلەکتریکێ ل من دا، دەستێن من کەلەپچە کرن و یەک ژ کارمەندێن ھێزێن ئەولەھیا ئیرانێ ژی دەستدرێژیا سەکسی ل سەر من کر.
ئەو ژنا رۆژنامەڤانا خواندەڤانا بەشا زانستێن سیاسی یا زانینگەھا بەھەشتی یا تەھرانێ، بەری نھا ل گەل چەند ئاژانسێن نووچەیانێن وەک ئیسنا و ئیقتساد ئۆنلاین کار کریە و د ھەیاما سالێن بۆری دە گەلەک جاران ژ ئالیێ ھێزێن ئەولەھیا ئیرانێ ڤە ھاتیە گازی کرن و لێکۆلین و لێپرسین ل گەل ھاتیە کرن.
