سەرۆککۆمارێ ترکیەیێ رەجەب تەییب ئەردۆگان راگھاند، ئەو رۆژا دوشەمبێ سەردانا ئیراقێ دکە و دچە بەغدا و ھەولێرێ ژی. گۆت ژی: “ئەڤە سەردانەکا پاشخستییە و مە گۆت کو دەما ھلبژارتنێن ترکییێ ب داوی ببن، ئەم دێ سەردانێ بکن.”
بریار بوو ئەردۆگان د ئیلۆنا سالا بۆری دە سەردانا ئیراقێ بکە، لێ ئەنقەرەیێ دەربارێ ڤێ سەردانێ دە تشتەک نەگۆت، ئەڤ ژی د دەمەکێ دە بوو کو ناکۆکیێن د ناڤبەرا ھەر دو وەلاتان دە ل سەر مژارێن ئاڤ و ئەنەرژیێ ھەبوون.
سەرۆککۆمارێ ترکییێ گۆت: “ئەم دێ ل بەغدایێ لگەل سەرۆکۆمارێ ئیراقێ لەتیف رەشید و سەرۆکوەزیر محەمەد شیاع سوودانی بجڤن و پشترە سەردانا ھەولێرێ بکن. ل ھەولێرێ ژی دێ دەرفەتا مە ھەبە کو ئەم مژارێن گرێدایی حکوومەتا ناڤەندی گۆتووبێژ بکن. ھەلبەت ئەڤ مژار، ئەم دێ د بن سیوانا گشتی یا تێکلیێن ترکیێ و ئیراقێ دە گۆتووبێژ بکن.”
تێ چاڤەرێکرن کو پشتی سەردانا ئەردۆگان، ترکیە و ئیراق پێوەندیێن خوە باشتر بکن، ھەروھا تێ چاڤەرێکرن کو ئەنقەرە و بەغدا رێکەفتنەکا ستراتەژیک ئیمزە بکن، کو تێ دە مژارێن ئەولەکاری، ئابۆری و گەشەپێدانێ و ھەروھا مژارێن ئاڤ و ئەنەرژیێ ژی ھەنە.
د سەردانا ئەردۆگانا بۆ ئیراقێ دە، مژارێن ئاڤ و ئەنەرژیێ، ھەڤکاریا تێکۆشینا ل دژی تەرۆرێ، چالاکیێن پارتیا کارکەرێن کوردستانێ (پەکەکێ) و پرۆژەیا “رێیا گەشەپێدانێ” دێ بێن رۆژەڤێ.
ئەردۆگان گۆت ژی: “ئەم داخوازێن گلیێن کو ئالیێن ئیراقی ڤە دەربارێ ئاڤێ دە پێشکێش کرنە، لێکۆلین دکن. ئەم ھەول ددن ڤێ پرسگرێکێ ب وان رە چارەسەر بکن. وێ گاڤێن مە ژی د ڤی واری دە بن.” دیار کر ژی: “پرسگرێکێن ھناردەکرنا گازا سرووشتی و پەترۆلێ بۆ ترکیێ ھەنە و ئەم ھەول ددن وان ژی چارەسەر بکن.”
رەجەپ تەییب ئەردۆگان ب ڤێ سەردانێ، د دیرۆکا ترکییێ دە دبە یەکەم سەرۆککۆمارێ ترکییێ کو سەردانا ئیراقێ بکە.
ئەردۆگان ب سەردانا بۆ بەغدا و ھەولێرێ، د دیرۆکێ دە دبە یەکەم سەرۆککۆمار و سەرۆکوەزیرێ ترکیێ کو سەردانا ھەولێرێ دکە. ئەردۆگان ھەری داوی سالا 2011 سەردانا ئیراقێ کربوو.
