یەک ژ دامەزرێنەرێن ئاک پارتیێ و وەزیرێ پەروەردەیا نەتەوی یێ بەرێ حوسەین چەلیک ئاک پارتی و ونداکرنا دەنگان نرخاند.
چەلیک د بەرسڤا پرسێن ھیلال کۆیلو یا سەربەستیەتێ دە ئەردۆگان و دەردۆرا وی رەخنە کرن و ئیدیعا کر کو تفاقا ب مەھەپێ رە ھاتیە چێکرن بوویە سەدەما ونداکرنا پارتیێ.
“کوردان دەست ژ دەنگدانا ئاکەپێ بەردان”
چەلیک ئەنجامێن ھلبژارتنێن 31 ئادارێ نرخاندن و دیار کر کو تفاقا لگەل مەھەپێ ھاتیە ئاڤاکرن ئاکەپە بەر ب خەتا ناسنامەیێ ڤە بریە. ل گۆر چەلیک، ژ بەر ڤێ سەدەمێ دەنگێن کوردان یێن ژ بۆ ئاکەپێ داکەتیە بنی. چەلیک گۆت: “ھەموەلاتیێن مە یێن کورد خوە نێزیکی ئاک پارتیا کو نیژادپەرەستی نەدکر، دکرن. ژ بەر ڤێ بەشەک گرینگ ژ وەلاتیێن مە یێن کورد دەنگێن خوە ددان ئاک پارتیێ”.
“تفاقا لگەل مەھەپێ رەوشا دینبوونێ یە”
چەلیک د دەربارێ تفاقا ئاکەپێ و مەھەپێ دە ژی گۆت: “ئاک پارتی پارتیەک دەمۆکراتیکا محافزکار بوو کو ل سەر ئۆلێ سیاسەت نەدکر. پاشێ خوە ڤەگوھەراند پارتیەک کو ل سەر نرخێن ئۆلی سیاسەتێ بکە و ب بایێ نەتەوەپەرەستیێ خوە مەحکوومی مەھەپێ کر. بەرێ من ژ ئیتیفاقا لگەل مەھەپێ رە گۆتبوو ‘رەوشا دینبوونێ’ و نھا دیسا ھەمان تشتی دبێژم”.
“دڤێت ئەردۆگان ژ خوە حەساب بپرسە”
حوسەیین چەلیک، دیار کر کو ژ بۆ ئاکەپە رێیا خوە بدۆمینە دڤێت ڤەگەرە سەر رێیا بەرێ و دیار کر کو ژ وەزیفەیێ دوورخستنا چەند جیگرێن سەرۆک، وەزیر و شێورمەندان تێرێ ناکە و گۆت: “گاڤا رەخنە بێ کرن یان فاتوورا بێ ژێکرن، دەستھلاتداریا کێ ھەبە، ھەمان بەرپرسیاریا وی ھەیە. ژ بەر ڤێ یەکێ بەرپرسیاریا کێ زێدەتر بە دڤێت ئەو زێدەتر حەساب بدە. ل ڤر بەرپرسیاریا ھەری مەزن یا برێز ئەردۆگانە. ل ڤر ل شوونا کو بەرپرسایەتیێ ژ ھندەکان وەرگرە، دڤێت برێز ئەردۆگان ژ خوە ژی حەساب بپرسە”.
