دۆزگەریا تەرۆرێ یا نەتەوەیی یا فره‌نسایێ (Pnat) راگهاند ل وی وەلاتی ب سه‌ده‌ما فیناسەکرنا په‌كه‌كێ 8 کەس هاتن دەستەسەرکرن.
ل گۆری نووچەیا Euronewsێ دۆزگەریا تەرۆرێ یا نەتەوەیی یا فره‌نسایێ (Pnat) ل سەر «کۆمکرنا پەرەیان ژ بۆ ئالیکاریا په‌كه‌كێ» لێپرسین دا دەستپێکرن.
د چارچۆڤەیا لێپرسینێ دە ل پاریس و هەرێما بۆئوچەس-دو-رهـوونەیێ 8 کەس ب سه‌ده‌ما فیناسەکرنا په‌كه‌كێ هاتن دەستەسەرکرن.
دۆزگەریا تەرۆرێ یا نەتەوەیی یا فره‌نسایێ راگهاند، دبە 8 کەسێن هاتن دەستەسەرکرن هەتا 96 دەمژمێران دەستەسەرکری بمینن و تێ گومانکرن کو وان کەسان د بن ناڤێ «باجا شۆرەشێ» دە ژ جڤاکا کورد یا فره‌نسایێ پەرە کۆم کرنە.
لێپرسین ب تاوانێن «ب ئارمانجا ئامادەکرنا چالاکیێن تەرۆرێ بەشداریا رێخستنا تاوانێ»، «فینانسەکرنا چالاکیێن تەرۆرێ»، «د ناڤ چەتەیەکی رێکخستی دە زۆری و هەولا زۆریێ» هاتیە ڤەکرن.
تێ ئیدیعاکرن کو ئەو چالاکی د ناڤبەرا سالێن 2020 و 2024ان دە هاتنە کرن.
ژ ئالیێ دن ڤە، ل بەلچیکایێ ژی دوهـ پۆلیسان ب سەر ئاڤاهیا تەلەڤیزیۆنێن ستێرک تی ڤی و مەدیا نیۆز دە گرت و ل ستودیۆیان گەریان.
لێگەرینا ل ستێرک تی ڤی و مەدیا نیۆزێ د چارچۆڤەیا لێپرسینا ل فره‌نسایێ دە هاتیە کرن و دۆزگەریا تەرۆرێ یا نەتەوەیی یا فره‌نسایێ (Pnat) ژی ئەڤ تشت پشتراست کر.
فره‌نسایێ 3 کورد رادەستی ترکیێ کربوون
ل فره‌نسایێ د دەمێن داوی دە زەختا ل سەر کوردێن کو ژ ترکیەیێ رەڤیانە زێدەتر بوویە.
فره‌نسایێ تەڤی نەرازیبوونێن گەلێ کورد ژی مەها سباتێ فراز کۆرکماز و 9ێ نیسانا 2024ان ژی مەهمەت کۆپال رادەستی ترکیێ کرن.
هەر دویان ژی ژ بەر خەباتێن سیاسی جەزا وەرگرتبوو و وەکی پەنابەرێن سیاسی چووبوون فره‌نسایێ.
پەنابەرێ کورد سەرهات گولتەکنێ کو ل ترکیەیێ 15 سال جەزایا گرتیگەهێ لێ هاتیە برین رۆژا 10ێ نیسانێ ل فره‌نسایێ هات گرتن و 12ێ نیسانێ رادەستی ترکیێ هات کرن.
