هاکان فیدان ل سەر سەردانا ئەردۆگانا هەولێرێ پەیامێن گرینگ دان

وەزیرێ دەرڤەیێ ترکیەیێ رادگەهینە، «د سەردانا مە یا هەولێرێ دە، سەرۆککۆمارێ ترکیەیێ پشتەڤانیا خوە ژ بۆ هەرێما کوردستانێ تەکەز کر».

وەزیرێ دەرڤەیێ ترکیەیێ هاکان فیدان د کۆنفرانسەکە رۆژنامەڤانی یا هەڤپار ل گەل وەزیرێ دەرڤەیێ نەوزیلاندایێ دە راگەهاند، «سەرۆککۆمارێ ترکیەیێ رەجەپ تاییپ ئەردۆگان د سەردانا مە یا هەولێرێ دە پشتەڤانیا خوە ژ بۆ هەرێما کوردستانێ تەکەز کر».

وەزیرێ دەرڤەیێ ترکیەیێ هەروەسا گۆت، «دۆستینی و جیرانتیا هەرێما کوردستانێ ژ بۆ ترکیەیێ گەلەک گرنگە».

سەرۆککۆمارێ ترکیەیێ رەجەپ تاییپ ئەردۆگان تەڤی شاندەکە وەلاتێ خوە رۆژا دوشەمێ، 22/04/2024، سەعەت 20:30 گەهشت بالافرخانەیا ناڤدەولەتی یا هەولێرێ و ژ ئالیێ سەرۆکێ هەرێما کوردستانێ نێچیرڤان بارزانی و سەرۆکێ حکوومەتا هەرێما کوردستانێ مەسروور بارزانی ڤە پێشوازیا وی هات کرن.

پاشتر د جڤینەکە هەڤپار دە کو هەژمارەکە بەرپرسێن بلندێن هەرێما کوردستانێ تێ دە ئامادە بووبوون، دانووستاندن ل سەر پێشخستنا پەیوەندیێن دوئالی و داوی گوهەرتنێن ئیراق و دەڤەرێ هاتن کرن.

هەر دو ئالی د وێ جڤینێ دە ل سەر گرنگیا پاراستنا ئەولەهی و سەقامگریا دەڤەرێ و چارەکرنا دوبەرەکیێن د ناڤبەرا هەرێما کوردستانێ و حکوومەتا ئیراقێ دە ب رێیا دانووستاندنان و ل سەر بنگەها دەستووری هەڤنەرین بوون.