ئامەریکا 11 وەلاتیێن خوە ژ کامپێن رۆژئاڤایێ کوردستانێ ڤەگەراندن

د پرۆسەیا ھەری مەزن یا ڤەگەراندنا وەلاتیێن خوە دە، ئامەریکا 11 وەلاتیێن خوە ژ کامپێن رۆژئاڤایێ کوردستانێ ڤەگەراندن.

بەردەڤکێ وەزارەتا دەرڤەیا ئامەریکایێ ماتیۆ میلەر ل سەر پلاتفۆرما “X”ێ گۆت: “ئامەریکا د مەزنترین وەرگرتنا وەلاتیێن خوە ژ باکورێ رۆژھلاتێ سووریێ دە، 11 وەلاتیێن خوە کو 5 ژ وان بچووکن، ڤەگەراندنە.”

میلەر د داخویانیا خوە دە دا زانین ژی، ئامەریکا ژ بۆ ڤەگەراندنا 6 وەلاتیێن کەنەدایی، 4 وەلاتیێن ھۆڵاندی و زارۆکەکی فینلاندایی بۆ وەلاتێن وان ژی ھێسانکاری کریە.

بەردەڤکێ وەزارەتا دەرڤەیا ئامەریکایێ تەکەز کر ژی: “ئەم د وێ باوەریێ دە نە کو ڤەگەرا خزمێن چەکدارێن بیانی یێن داعشێ ژ کامپێن سوورییێ، ژ بۆ چارەسەریا ریشەیی یا ئەولەکاریا سوورییێ گرینگە.”

ھەروھا میلەر بانگ ل وەلاتان کر کو وەلاتیێن خوە ژ کامپێن ل رۆژئاڤایێ کوردستانێ و باکورێ رۆژھلاتێ سوورییێ ڤەگەرینن ناڤەندێن چاکسازیێ بەری کو وان ژ نوو ڤە تەڤلی جڤاکێ بکن.

ئاشکەرە کر ژی: “ئاگاھیێن مە ھەنە کو نێزیکی 25 ئامەریکی ل کامپێن باکورێ رۆژھلاتێ سوورییێ ھەنە.”

کامپا ھۆلێ دکەڤە پارێزگەھا حەسەکێ یا رۆژئاڤایێ کوردستانێ و دۆرا 50 ھەزار کەس ژ زێدەتر ژ 60 وەلاتان لێ دمینن کو پرانیا وان ژن و زارۆکێن داعشێ نە.

کامپا ھۆلێ یەک ژ مەزنترین کامپێن سووریێ و رۆژئاڤایێ کوردستانێ یە. رێڤەبەریا خوەسەر چەندین جارن دبێژە کو رەوشا کامپا ھۆلێ پێویستیا وێ ب دەستێوەردانەکا ناڤدەولەتی ھەیە و دڤێت وەلاتێن جھانێ وەلاتیێن خوە ژ کامپێ وەربگرن.